पोखरा ।

सामाजिक सञ्जालमा लागेको प्रतिवबन्ध फूकुवाका साथै भ्रष्टाचार विरुद्ध जेन जीले अभियान थालेको दोस्रो दिनमै मुलुकमा सत्ता पलट भएको छ । पहिलो दिन १९ जना प्रदर्शनकारीको ज्यान गएपछि दोस्रो दिन आन्दोलनले उग्र रुप लियो । दोस्रो दिन प्रधानमन्त्रीले त राजीनामा दिए नै सुरक्षा निकायले पनि तदारुकता देखाउने अवस्था रहेन ।

जसका कारण राजधानी काठमाडौं र पोखरा लगायत सहरका अधिकांश सरकारी कार्यालयसहित नेता तथा व्यवसायीका निजी सम्पतिमा तोडफोड र आगजनी भएको छ । सत्ताको नेतृत्वले नागरिकतहको असन्तुष्टि स्वीकार नगर्दाको परिणाम मुलुकले कहिल्यै नभोगेको क्षति भोगेको छ । प्रधानमन्त्री केपी शर्मा ओलीसहित कांग्रेस सभापति शेरबहादुर देउवा माओवादी अध्यक्ष प्रचण्डको लज्जापूर्ण बहिर्गमन भएको छ । जेनजीको आन्दोलन मंगलबार पोखरा र काठमाडौंमा हिंस्रक रूप लिँदा संसद् भवनदेखि प्रमुख नेताका निजी निवास र सरकारी कार्यालयहरू जलेर ध्वस्त भएका छन् ।

अहिले सुरक्षाको नेतृत्व नेपाली सेनाले लिएको छ । राजनीतिक भविष्य कता मोडिने हो कसैले अनुमान गर्न सकेको छैन । राजनीतिक विश्लेषकहरु संघीय लोकतान्त्रिक व्यवस्थालाई नै सुधार गरेर लैजानुपर्ने सुझाव दिएका छन् ।

त्यसो त जेन जीले आन्दोलन शान्तपूर्ण हुने बताइए पनि घुसपैठका कारण अत्यधिक क्षति भोग्नु परेको छ । पोखरामा आगजनीमा उत्रेको समूह हातमा खुँडा र खुकुरी सहित अन्य हतियार लिएर ट्रिपर, ट्रक र मोटरसाइकलमा एकपछि अर्को कार्यालयमा पुगेका थिए । जहाँ प्रहरीको उपस्थिति शून्य थियो ।

पोखरामा बिहान करिब ९ बजेदेखि सुरु भएको आन्दोलन साँझसम्मै नियन्त्रणबाहिर रह्यो । पोखरा महानगरपालिका कार्यालय अगाडि प्रदर्शनकारीले सबैभन्दा पहिला टायर बालेर विरोध जनाएका थिए । सो क्रममा प्रहरीसँग झडप हुँदा अश्रुग्यास प्रहार र हवाई फायरसमेत भयो । प्रहरीले चलाएको गोली लागेर एक जना आन्दोलनकारी घाइते भई अस्पताल लगिएको थियो ।

बिहानदेखि नै आक्रोशित प्रदर्शनकारीले पोखरा महानगरपालिका मात्र नभई वडा ८, वडा ५, वडा ३, वडा १, वडा १२, वडा १५, वडा ११, वडा २ र वडा ४ का कार्यालयमा समेत आगजनी र तोडफोड गरे । राति न्यूरोडस्थित भाटभटेनीको भवनमा आगो लगाइयो भने लेकसाइडस्थित बगैँचा रिसोर्टलगायत केही होटलमा आक्रमण गरिएको थियो ।

सहिदचोक क्षेत्रमा रहेका अधिकांश सरकारी निकाय लक्ष्य बने । गण्डकी प्रदेश सभा सचिवालय र प्रदेश प्रशिक्षण कार्यालयमा आगजनी गरियो भने मुख्यमन्त्री तथा मन्त्रिपरिषद् कार्यालय, मुख्यमन्त्रीको निवास र प्रदेश प्रमुखको निवाससमेत जलाइयो । जिल्ला प्रशासन कार्यालय र छेउमै रहेको प्रदेश नीति तथा योजना आयोगको कार्यालय पनि ध्वस्त बने ।

प्रदर्शनकारीले गण्डकीका सामाजिक विकास, युवा तथा खेलकुद मन्त्री बिन्दुकुमार थापा र पोखरा महानगरका मेयर धनराज आचार्यको घरमा समेत आगजनी गरे । एमाले गण्डकी प्रदेश कार्यालय, एमाले कास्की जिल्ला कार्यालय, नेपाली कांग्रेस कास्की जिल्ला कार्यालय, कास्की जिल्ला अदालत, वन तथा वातावरण मन्त्रालयजस्ता कार्यालयसमेत जलेर क्षतिग्रस्त बने ।

गण्डकी प्रदेशका पूर्व मुख्यमन्त्री कृष्णचन्द्र नेपाली पोखरेलको नवलपुरस्थित घरमा तोडफोड गर्दै सामान बाहिर ल्याई जलाइयो । त्यस्तै, एमाले स्थायी कमिटी सदस्य खगराज अधिकारीको पोखरा–१२ स्थित निजी घरमा क्षति पुर्‍याइयो । गैह्रापाटनस्थित जिल्ला प्रहरी कार्यालय खाली गराएर आगो लगाइयो । त्यसअघि, प्रदर्शनकारीले डोजर प्रयोग गरेर भवन ढाल्ने प्रयास गरेका थिए तर प्रहरीले अश्रुग्यास प्रहार गरी तितरबितर बनाएको थियो ।

त्यसैदिन बेलुकी करिब साढे ७ बजे कास्की कारागारसमेत तोडफोड भयो । जेनजी आन्दोलनकारीको सहयोगमा भित्रैका कैदीबन्दी बाहिर निस्किएपछि करिब ७ सय ७३ जना भाग्न सफल भएको प्रहरीले जनाएको छ ।

काठमाडौंमा पनि अवस्था उस्तै रह्यो । सिंहदरबार, राष्ट्रपति भवन र सर्वोच्च अदालतलगायत प्रमुख सरकारी कार्यालयमा आगो अझै दन्किरहेको छ ।