पोखरा । नेपाल राष्ट्र बैंकका गभर्नर डा. विश्व पौडेलले आफूले जीवनमा कसैसँग एक रुपैयाँ नलिए पनि प्रदर्शनकारीहरूको रिस आफ्ना वृद्ध आमाबाबु बस्ने चितवनस्थित घरमा पोखिएको गुनासो गरेका छन् ।

चितवनको घरमा भएको आक्रमणको भिडियो सार्वजनिक गर्दै उनले ८२ वर्षीया मुटुको अपरेसन गरेकी आमाको कोठामै पहिलो प्रहार भएको बताए । पौडेलका अनुसार उनका बुबा अहिले ८७ वर्षका भएका छन् र ६७ वर्षअघि चितवन झरेका थिए ।

‘यो मेरो गाउँको घर हो। गभर्नर भएपछि पनि हरेक हप्ता एक छाक भएपनि बाआमासँग खाना खान पुग्थेँ,’ उनले लेखेका छन् । उनले जीवनभर कसैसँग पैसा नलिएको उल्लेख गर्दै आफ्नो शैक्षिक यात्रा सम्झिएका छन् ।

‘चितवनमा सधैँ कक्षामा फस्ट हुन्थेँ। गाउँकै विद्यालयमा पढेर दाइ अहिले अमेरिकामा प्राध्यापक हुनुहुन्छ, म नेपालमै बस्ने निर्णय गरेर केयुमा प्राध्यापक बनेँ। यो घर विद्यार्थी हुँदा १५ वर्षअघि नै बनेको हो,’ उनले प्रष्ट पारेका छन् ।

पौडेलले थपे, ‘मेरो रिस मेरो भैंसेपाटीको घर जलाएर नपुगी मेरा वृद्ध बाआमा बसेको चितवनको घरमा पोख्ने साथीहरूको फलोस् फुलोस्।’