पोखरा । पछिल्लो राजनीतिक संकटलाई सम्बोधन गर्ने उद्देश्यले राष्ट्रपति रामचन्द्र पौडेलले शुक्रबार शीतल निवासमा संविधानविदहरुसँग लामो छलफल गरेका छन् । सोही परामर्शपछि आन्दोलनरत जेन–जी पुस्ताको मागअनुसार पूर्वप्रधानन्यायाधीश सुशीला कार्कीलाई प्रधानमन्त्री बनाउने तयारी भएको स्रोतले जानकारी दिएको छ ।त्यसअघि राष्ट्रपतिले सभामुख देवराज घिमिरेसँग समेत छलफल गरेका थिए ।

उनले पालैपालो जेनजी प्रतिनिधिसँग पनि कुराकानी गरेका थिए ।

संविधान कायमै राखेर विशेष अधिकार प्रयोग गरी राष्ट्रपतिले अन्तरिम सरकार बनाउने र त्यसका बारेमा सभामुखले सदनलाई जानकारी गराउने विषयमा छलफल भएको स्रोतको दाबी छ ।

राष्ट्रपतिले बिहीबार नै नेकपा माओवादीका अध्यक्ष प्रचण्ड र कांग्रेसका नेताहरुसँग पनि छलफल गरेका थिए ।
बिहीबार दिउँसो नै प्रधानसेनापति अशोकराज सिग्देल राष्ट्रपतिलाई भेट्न शीतलनिवास पुगेका थिए । उनले मुलुकको वर्तमान परिस्थितिका बारेमा ब्रिफिङ गरेका थिए ।

संविधानविदहरुले अन्तरिम सरकारमा नयाँ पुस्ताको प्रतिनिधित्व हुनैपर्ने सुझाब दिएका थिए । उनीहरु मध्ये एक जनाले भने, ‘आन्दोलनकारी युवाहरुको भावनाको कदर गर्दै दलबाहिरको स्वतन्त्र व्यक्तिलाई नेतृत्वमा ल्याउनुपर्ने सुझाव हामीले राष्ट्रपतिलाई दिएका छौं । भोलि बिहानसम्म सुशीला कार्की प्रधानमन्त्री बन्ने आशा गरेको छु ।’

शीतल निवासमा पुगेका संविधानविदहरुमा भीमार्जुन आचार्य, विपीन अधिकारी, पूर्णमान शाक्य, चन्द्रकान्त ज्ञवाली, सूर्य ढुंगेल र ललितबहादुर बस्नेतलगायत रहेका थिए । उनीहरु केही घण्टासम्मको छलफलपछि साँझ ८ बजेपछि मात्र बाहिरिएका थिए ।

शीतल निवासमाथि भएको आगलागीबारे उठेको प्रश्नमा एक संविधानविदले भने, ‘शीतल निवासको अगाडिको भाग मात्र जलेको रहेछ, तर नयाँ भवनलाई नेपाली सेनाले जोगाएको रहेछ । हामीले त्यहीँ राष्ट्रपति पौडेलसँग भेट गरेका हौं । उहाँ सुरक्षित हुनुहुन्छ, सेनाको नियन्त्रण भन्ने हल्ला मात्रै हो ।’

दलका शीर्ष नेताहरुलाई अस्वीकार गरिरहेको जेन–जी पुस्ताको मागलाई ध्यानमा राख्दै राष्ट्रपतिले दलबाहिरकै व्यक्तिलाई नेतृत्व दिने तयारी गरेको दाबी संविधानविदहरुको छ । उनीहरुले अहिलेको परिस्थितिमा कार्की प्रधानमन्त्री हुने सम्भावना उच्च रहेको बताएका छन् ।

पूर्वप्रधानन्यायाधीश कार्की प्रधानमन्त्री चयन भएमा नेपालको इतिहासमै पहिलो महिला प्रधानमन्त्री बन्नेछिन् ।