काठमाडौं । अनेरास्ववियुका नेता–कार्यकर्ताले अध्यक्ष डा. सुजन कडरियाको नेमप्लेट झिकेर जलाएका छन् । शनिबार उनीहरूको समूहले कडरियाको फोटोसमेत तोडफोड गरेको छ ।

जेन–जी आन्दोलन चर्किएपछि असुरक्षा भएको भन्दै कडरियाले भदौ २४ गते राजीनामा दिएका थिए । भदौ २३ गतेको आन्दोलनमा प्रहरीको गोली लागी २४ जना युवा–विद्यार्थीको मृत्यु भएपछि पदमा बसिरहन नैतिकताले नदिएको उनको दाबी थियो ।

तर भोलिपल्टै उनले आफूलाई ज्यान मार्ने धम्की आएको, कुटपिट भएको भन्दै राजीनामा फिर्ता लिन खोजेका थिए । यद्यपि उनको राजीनामा औपचारिक रूपमा स्वीकृत भइसकेको छैन ।

कार्यकर्ताले भने ‘फर्केर पनि अखिलको कार्यालय नहेर्नु’ भन्दै उनलाई अस्वीकार गरिरहेका छन् ।