पोखरा ।

राष्ट्रिय स्वतन्त्र पार्टी (रास्वपा) की नेतृ तथा पूर्वशिक्षामन्त्री सुमना श्रेष्ठले पार्टी परित्याग गरेकी छन् । पार्टी छोडेको औपचारिक जानकारी दिँदै उनले भनिन्, ‘अब खुला रूपमा आक्रमण गर्ने हो भने पनि सजिलो बनाइदिएको छु । मनलाग्दी चलुन्जेल मनलाग्दी गर्नुहोला । मैले पार्टी छाडे ।’

श्रेष्ठले केन्द्रीय समितिलाई पठाएको पत्रमा पार्टी नेतृत्वले गल्ती गर्दै आए पनि कहिल्यै त्यसको जिम्मेवारी नलिने गरेको आरोप लगाएकी छन् । उनले लेखेकी छन्, ‘गल्तीमाथि गल्ती गरिरहने र त्यसको बोझ पार्टीका सबैले बोकिरहनु पर्ने ?’ उनको भनाइमा, पार्टीभित्र आलोचना गर्ने सदस्यहरूलाई मिडियामार्फत अपमानित गर्ने र नेतामुखी प्रवृत्ति बढ्दै गएको छ ।

उनले थप भनिन्, ‘जहिलेदेखि राष्ट्रिय स्वतन्त्र पार्टीले देशभन्दा माथि पार्टी र पार्टीभन्दा माथि नेतालाई राख्न थालेको हो, त्यतिबेलादेखि नै आलोचना गर्दै आएकी हुँ ।’

यसअघि उनले रास्वपाको सह-महामन्त्री पदबाट राजीनामा दिएकी थिइन् । त्यतिबेला सांसद भएकै कारण पार्टीको नियमित काममा समय दिन नसक्ने भन्दै उनले राजीनामा दिएकी थिइन् । समानुपातिकतर्फबाट सांसद बनेकी श्रेष्ठ प्रचण्ड प्रधानमन्त्री हुँदा शिक्षामन्त्री बनेकी थिइन् ।

हालै सुशीला कार्की नेतृत्वमा नयाँ क्याबिनेट गठनको चर्चा चल्दा श्रेष्ठलाई पनि मन्त्री बन्ने सम्भावनासहितको हल्ला रास्वपाभित्रै उठेको थियो । तर उनले आफू त्यस दौडमा नरहेको स्पष्ट पारेकी थिइन् । जेनजी विद्रोहीसँग निरन्तर सम्पर्कमा रहेकी श्रेष्ठ प्रधानमन्त्री कार्कीको शपथग्रहण समारोहमा समेत सहभागी भएकी थिइन् ।