पोखरा ।

सरकारले फागुन २१ गते प्रतिनिधि सभा चुनाव घोषणा गरेपछि अब त्यो चुनावमा भोट हाल्न मतदाता नामावलीमा नाम लेखाउन पाइन्छ कि पाइँदैन भन्ने चासो युवायुवतीमा बढेको छ ।

१८ वर्ष पुगेका र मतदाता नामावलीमा नाम लेखाएकाहरू चुनावमा भोट दिन योग्य हुन्छन् ।

कसैले १६ वर्षमै नागरिकता बनाएको र त्यस बेलै मतदाता नामावलीमा नाम लेखाइसकेको भए पनि चुनाव हुनुअघि १८ वर्ष पुगेका खण्डमा उसले मतदान गर्न पाउँछ ।

भदौ २३ र २४ मा भएको आन्दोलनपछि जेन–जी समूहको प्रस्तावअनुसार पूर्वप्रधान न्यायाधीश सुशीला कार्की प्रधानमन्त्री नियुक्त भएर कार्यभार सम्हालिसकेकी छन् ।

प्रधानमन्त्री नियुक्ति भई शपथ लिएपछि उनले राष्ट्रपति भवन शीतल निवासमै मन्त्रिपरिषद बैठक गरी प्रतिनिधि सभा विघटन र फागुन २१ मा चुनाव गर्ने मिति सिफारिस गरेकी थिइन् ।

राष्ट्रपति रामचन्द्र पौडेलले प्रतिनिधि सभा विघटन र चुनाव मिति अनुमोदन गरिसकेका छन् भने चुनावलाई सहयोग गर्न पनि आग्रह गरेका छन् ।

फागुन २१ गते हुने चुनावका लागि अब मतदाता नामावलीमा नाम लेखाउन मिल्छ कि मिल्दैन भन्ने विषय युवायुवतीका लागि चासोको विषय बनेको छ ।

निर्वाचन आयोगसँग प्राप्त जानकारी अनुसार सहसचिव नीता पोखरेल अर्यालले भनेकी छन् कि निर्वाचन मिति घोषणा भएपछि मतदाता नामावलीमा नाम समावेश गर्न नपाउने व्यवस्था छ ।

तर यसपटक दुई दिने आन्दोलनपछि केपी शर्मा ओली नेतृत्वको सरकार ढलेको र सुशीला कार्की नेतृत्वमा अन्तरिम सरकार बनेर प्रतिनिधि सभा विघटन गरी चुनाव घोषणा भएको अवस्थामा विशेष परिस्थिति देखिएको छ ।

निर्वाचन आयोगका एक पदाधिकारीले भने, ‘अहिले मुलुकमा विशेष परिस्थिति छ, अपरझट चुनाव घोषणा भएको अवस्थामा मतदाता नामावलीमा नाम लेखाउन केही समय दिने कि नदिने भन्ने विषयमा आयोगमा छलफल भइरहेको छ । आयुक्तहरूबीच छलफलपछि यसबारे निर्णय आउला ।’

मतदाता नियमावली ऐन २०६३ को दफा ४ को २ को २ अनुसार निर्वाचन मिति घोषणा भएपछि सो निर्वाचन प्रयोजनका लागि मतदाता नामावलीमा नाम दर्ता गरिने छैन भन्ने व्यवस्था छ ।

तर सरकारले चाहेमा यो नियम हटाउन राष्ट्रिय सभाको अधिवेशन अन्त्य गरेर अध्यादेश ल्याउन सक्छ ।