पोखरा ।
जेन–जी आन्दोलनका क्रममा भएको तोडफोड र आगजनीका दृश्य सार्वजनिक गर्न थालेपछि समाधान दैनिकलाई धम्की दिइएको छ ।

गत भदौ २३ गते आन्दोलनकै क्रममा सरकारी तथा निजी सम्पत्तिमा गरिएको आक्रमणको भिडियो समाधानले फेसबुकमार्फत सार्वजनिक गर्दै आएको थियो । ती दृश्य सार्वजनिक भएपछि राजेन्द्र अधिकारीले फेसबुकबाट धम्की दिएका हुन् ।

समाधान मिडिया प्रालिको फेसबुक पेज समाधानन्यूजबाट आइतबार दिउँसोदेखि तोडफोड, आगजनी र लुटपाटमा संलग्नहरुको अनुहारसमेत देखिने खालका भिडियोहरु अपलोड भैरहेका छन् । ती भिडियोले ध्वंशकारीहरुको पर्दाफास गरिरहेको छ । संलग्न रहेका व्यक्ति र समुहहरुको पहिचान खुल्दैछ ।

मिडियाले सार्वजनिक रुपमै त्यस्ता भिडियोहरु पठाउन सर्वसाधारणलाई आग्रह गरेअनुसार भिडियोहरु प्राप्त भैरहेका छन् ।
यी भिडियोबाट अपराधीहरुको अनुहार उदाङ्गो हुनथालेपछि समाधानलाई धम्की दिइएको छ । धम्की दिने अधिकारीले आफ्नो फेसबुक स्टाटसमा लेखेका छन्, ‘एमालेको मुखपत्र समाधान दैनिक आफैं ठगीमा संलग्न छ । ठगीको आफ्नो साम्राज्य बचाउन जुन हर्कत गर्दैछ, आत्मघाती नहोस् ।’

यो यति मात्र होइन, अधिकारीले यसअघि पनि प्रमाणबिना पटक–पटक समाचार र फेसबुक स्टाटसमार्फत धम्कीपूर्ण अभिव्यक्ति दिँदै आएका छन् । उनको स्टाटसलाई भिडिओ हटाउन गरिएको धम्कीका रूपमा समाधानले बुझेको छ। यस्ता धम्कीबाट नडराई समाधानले थप भिडिओ सार्वजनिक गर्दै जाने प्रतिवद्धता व्यक्त गर्छ । साथै, यस्ता थप भिडिओहरू उपलब्ध गराउन आम सर्वसाधारणलाई आग्रह गरेको छ।