पोखरा । गण्डकी प्रदेशसभा सचिवालयले प्रतिनिधि सभा भवन र सचिवालयमा भएको चोरीका सामान फिर्ता गर्न आग्रह गरेको छ ।
प्रदेशसभा सचिवालयले आईतबार हस्तलिखित सूचना सार्वजनिक गर्दै चोरी भएका सामान फिर्ता गर्न आग्रह गरेको हो । जेनजी आन्दोलनका क्रममा प्रदेशसभा भवनदेखि सचिवालय र पुस्तकालयसम्म ध्वस्त हुँदा सचिवालय बाध्य भएर हातैले पत्र लेखेको हो ।
सचिवालयका अनुसार आन्दोलनकारीले प्रयोगमा आउने सामान्य सामग्रीदेखि लिएर फुलको गमला र फाइलसम्म चोरी गरेका छन् । ती सबै सामान फिर्ता गर्न आग्रह गर्दै सार्वजनिक गरिएको सूचनामा दुईपांग्रे र चारपांग्रे सवारी साधन, कम्प्युटर, ल्यापटप, प्रिन्टर, भिडियो क्यामेरा, क्यामेरा, टेलिभिजन, स्मार्टबोर्ड, कुर्सी, टेबुल, दराज, सोफा लगायतका सामग्री चोरी भएको उल्लेख गरिएको छ ।
उक्त घटनामा गण्डकी प्रदेश सभा सचिवालय, प्रदेशसभा सदस्यको कार्यालय र सचिवालयका कर्मचारी तथा सभामुख, उपसभामुखको नागढुंगास्थित निवासमा चोरी भएको उल्लेख गरिएको छ ।
साथै, चोरी भएका सामग्री फिर्ता नभएमा त्यसले गण्डकी प्रदेशसभाको नियमित कार्यमा असर पुग्ने पत्रमा उल्लेख गरिएको छ ।
जेनजी आन्दोलनका क्रममा गण्डकी प्रदेशका धेरै कार्यालयमा तोडफोड, आगजनी हुनुका साथै बाँकी रहेका सामान पनि चोरी भएको तथ्यांक सार्वजनिक भएको छ ।