पोखरा ।
जेन-जि आन्दोलनका कारण सार्वजनिक सेवा प्रवाहमा गम्भीर अवरोध ल्याएपछि वडा नं १२ ले आपतकालीन पुननिर्माण योजना अगाडि सारेको छ ।

टोल विकास संस्था, आमा समूह, क्लब, स्थानीय समाजसेवी तथा संघ-संस्थाको भेलाले वडास्तरीय पुनर्निर्माण मूल समितिको संयोजकमा समाजसेवी टिकाबहादुर कार्की चयन भएका छन् ।

गत साता भएको जेन-जि आन्दोलनका क्रममा कार्यालयमा भीषण तोडफोड र आगजनी हुँदा सम्पूर्ण अभिलेख, कम्प्युटर, फर्निचर र उपकरण जलेर नष्ट भएकाे वडाध्यक्ष सन्तोष बास्तोलाले बताए । भवनका झ्यालढोका, सिसा र पर्खालमा क्षति पुगेको छ । स्वास्थ्य केन्द्र र सडक संरचनाहरु पनि आंशिकरूपमा क्षतिग्रस्त भएका उनकाे भनाइ छ ।

‘हामीले प्राथमिकता अनुसार मर्मत सुरु गर्ने छौं । वडा कार्यालय सञ्चालनमा ल्याउने पहिलो लक्ष्य हो । मूल समितिसँग सहकार्य गरेर अघि बढ्ने योजना बनाएका छौं,’ उनले भने ।

पुननिर्माण समितिको सचिवमा पूर्ण गुरुङ, कोषाध्यक्षमा लक्ष्मी कोइराला र सदस्यमा डा अनिल सुवेदी, मिन गुरुङ, दानबहादुर बस्नेत र विर बहादुर थापा छन् ।

स्थानीय बासिन्दा सुशील केसीले आफ्नो वडा आफैं बनाउनुपर्छ भनेर जुटेका बताए । यसका लागि राज्य, स्थानीयकाे सहयाेग चाहिने उनले बताए ।