पोखरा ।
नेकपा एमाले पार्टी केन्द्रीय कार्यालय च्यासलमा गण्डकी सम्पर्क कमिटी र कास्की–काठमाडौं सम्पर्क मञ्चका कार्यकर्ताहरुसँग अहिलेको राजनीतिक अवस्थाबारे समीक्षा तथा छलफल गरिएको छ ।

बैठकमा कठिन परिस्थिति बीच पनि एकताबद्ध भएर अघि बढ्नुपर्ने निष्कर्ष निस्किएको गण्डकीका पूर्वमुख्यमन्त्री खगराज अधिकारीले बताए । भूराजनीतिक प्रभावको यथार्थ विश्लेषण गर्दै नेपालको आन्तरिक सुरक्षामाथि चुनौती बढ्दै गएको भन्दै उनले चिन्ता व्यक्त गरे ।

दलाइ लामाले पहिलो पटक नेपालको प्रधानमन्त्रीलाई शुभकामना दिनु शंकास्पद रहेको अधिकारीको तर्क छ । सिंहदरवार र संघीय संसद् भवनजस्ता संवेदनशील संरचना ध्वस्त पारिनु, पूर्वप्रधानमन्त्री दम्पतीमाथि आक्रमण हुनु, देशभरका जेलहरुमा तोडफोड गरिनु सामान्य नभएको बैठकले ठहर गरेको उनले जानकारी दिए ।

‘बैठकले सहकारी तथा गरीबी निवारण विभागको बैठकसमेत सम्पन्न गर्दै प्रतिकूलतालाई अनुकूलतामा बदल्ने संकल्प गरेको छ । साथै आन्दोलनका शहीदप्रति सम्मान, घाइतेहरुलाई शीघ्र स्वास्थ्यलाभको शुभकामना व्यक्त गर्दै जेनेरेसन जेन्जीले उठाएका मागप्रति गम्भीर ध्यानाकर्षण गराइएको छ,’ उनले भने ।