काठमाडौं ।
जेनजी आन्दोलनका क्रममा आगलागी भएको यातायात व्यवस्था विभागको भवनका प्रायः सबै सामग्री जलेर नष्ट भए पनि त्यहाँ रहेका तथ्यांकहरू सुरक्षित भेटिएका छन् । विभागका अनुसार सवारी चालक अनुमतिपत्र (लाइसेन्स) सम्बन्धी सम्पूर्ण विवरण सुरक्षित रहेको छ ।

विभागले लाइसेन्सको डेटा एकीकृत डेटा व्यवस्थापन केन्द्र, सिंहदरबारमा पनि राखेको थियो । त्यसैगरी, कार्यालयभित्र रहेको डेटा ब्याकअप पनि सुरक्षित रहेको जनाइएको छ । सिंहदरबारस्थित केन्द्रमा र विभागको डेटा ब्याकअपमा तथ्यांकहरू सुरक्षित छन् ।

यातायात व्यवस्था विभागका आइटी डाइरेक्टर केशव खतिवडाले सबै नेपालीको लाइसेन्सको तथ्यांक सुरक्षित रहेको बताए । उनले भने, ‘सबैको लाइसेन्सको तथ्यांक सुरक्षित रहेको छ । हामीले तथ्यांकको एउटा डेटा ब्याकअप विभागमा र अर्को सिंहदरबारमा राखेका थियौँ । विभागमा भएको डेटा ब्याकअप पनि सुरक्षित छ, किनकि ब्याकअप राखेको कोठामा धेरै क्षति भएन । सिंहदरबारमा भएको ब्याकअप पनि सुरक्षित नै छ ।’