( गण्डकीमा कांग्रेस संसदीय दलको बैठकले पुनर्निर्माण कोष स्थापना गर्न सरकारसँग आग्रह गर्दै सहयोग गर्न लागेको हो )

पाेखरा ।

नेपाली कांग्रेस गण्डकी प्रदेश संसदीय दलले प्रदेशमा जेनजी आन्दोलनका क्रममा भएको क्षति पुनर्निर्माणका लागि कोष स्थापना गर्न प्रदेश सरकारलाई आग्रह गर्दै आफ्नो तर्फबाट १० लाख रुपैयाँ सहयोग गर्ने निर्णय गरेको छ । गण्डकी प्रदेश संसदीय दलका नेता तथा मुख्यमन्त्री सुरेन्द्रराज पाण्डेको अध्यक्षतामा असोज २ गते बसेको संसदीय दलको बैठकले सो निर्णय गरेको हो ।

बैठकले जेनजी आन्दोलनमा ज्यान गुमाएकाहरूप्रति १ मिनेट मौनधारण गरी श्रद्धाञ्जली अर्पण गरेको प्रमुख सचेतक नन्दप्रसाद न्यौपानेले जानकारी दिए । बैठकले भदौ २३ र २४ गते भएका तोडफोड तथा ध्वंसात्मक गतिविधिहरूको निष्पक्ष न्यायिक छानबिन गरी दोषीमाथि कडा कानुनी कारबाही गर्न माग गरेको छ ।

आन्दोलनमा सहादत प्राप्त गरेका युवाहरू, सुरक्षाकर्मीहरू तथा दिवंगत भएका सम्पूर्ण नेपालीप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनप्रति हार्दिक समवेदना प्रकट गरिएको छ । घाइतेहरूको शीघ्र स्वास्थ्यलाभको कामना पनि बैठकले गरेको छ ।

न्यौपानेले भने, ‘जेनजीले आन्दोलनका क्रममा उठाएका सामाजिक सञ्जालमाथिको नियन्त्रण हटाउनुपर्ने, भ्रष्टाचार नियन्त्रण गर्नुपर्ने, सुशासनको प्रत्याभूति गर्नुपर्ने जस्ता मुद्दाप्रति दल प्रतिबद्ध छ ।’ यस सन्दर्भमा नेपाली कांग्रेस नेतृत्वको गण्डकी प्रदेश सरकारले मितव्ययिता कायम गर्न चालु खर्च घटाउने, दरबन्दी कटौती गर्ने, कार्यालय समायोजन गर्नेजस्ता सुशासनमैत्री कार्यहरूको प्रशंसा गर्दै अझ जनमैत्री र उत्तरदायी ढंगले अघि बढ्न आग्रह गरेको छ ।

नेपाली जनताले लामो संघर्षपछि निर्माण गरेको नेपालको संविधानकै मार्गबाट मुलुकको समुन्नति र नयाँ पुस्ताको चाहना पूरा हुन सक्ने भएकाले संविधानको रक्षा तथा सुदृढीकरण गर्नु सबैको कर्तव्य भएको बैठकले निष्कर्ष निकालेको छ । यसै सन्दर्भमा संविधानको मर्म र भावनाअनुरूप विषम परिस्थितिमा अभिभावकत्व निर्वाह गरेकोमा राष्ट्रपति रामचन्द्र पौडेलप्रति नेपाली कांग्रेस संसदीय दलले हार्दिक आभार व्यक्त गरेको छ ।

मुलुकमा रोजगारी सिर्जना र राजस्व उत्पादनमार्फत अर्थतन्त्रलाई गतिशील बनाउन योगदान दिइरहेको निजी क्षेत्रमाथि भएको गम्भीर आक्रमणको भत्र्सना गर्दै लगानीमैत्री वातावरण पुनःस्थापित गर्न संघ, प्रदेश र स्थानीय सरकारबीच समन्वयात्मक पहल गर्न प्रदेश सरकारलाई अनुरोध गरिएको छ ।

आन्दोलनका क्रममा नेपाली कांग्रेसका सभापति शेरबहादुर देउवासहित राजनीतिक दलका नेताहरु तथा आम नागरिकमाथि भएको आक्रमणको घोर भत्र्सना गर्दै उनीहरूको शीघ्र स्वास्थ्यलाभको कामना गरिएको छ । आन्दोलनका क्रममा गण्डकी प्रदेशभित्र सार्वजनिक तथा निजी क्षेत्रका भौतिक संरचना र यातायातका साधनमा ठूलो क्षति भएको हुँदा त्यसको यकिन विवरण तत्काल तयार गरी पुनर्निर्माणको योजना अघि ल्याउन प्रदेश सरकारलाई आग्रह गरिएको छ ।

यस विषम परिस्थितिमा सम्पूर्ण राजनीतिक दलहरु, नागरिक समाज, युवापुस्ता लगायत सबैमा धैर्य रही संवैधानिक तथा लोकतान्त्रिक मूल्य मान्यता अनुसार थप एकताबद्ध हुन पनि बैठकले अपिल गरेको छ ।