काठमाडौँ । नवनियुक्त चार मन्त्रीले आज शपथ ग्रहण गरे । राष्ट्रपति निवास शीतलनिवासमा आयोजित विशेष समारोहमा राष्ट्रपति रामचन्द्र पौडेलले पद तथा गोपनीयताको शपथ गराए ।

पूर्वन्यायाधीश अनिलकुमार सिन्हा, राष्ट्रिय आविष्कार केन्द्रका संस्थापक महावीर पुन, पत्रकार जगदिश खरेल र विज्ञ मदन परियारले मन्त्रीको शपथ लिए ।

सिन्हाले उद्योग, कानुन तथा भूमि व्यवस्थापन मन्त्रालय, पुनले शिक्षा, विज्ञान तथा प्रविधि मन्त्रालय, खरेलले सञ्चार तथा सूचना प्रविधि मन्त्रालय र परियारले कृषि तथा पशुपन्छी विकास मन्त्रालयको जिम्मेवारी सम्हाल्ने गरी शपथ ग्रहण गरे ।

अतिरिक्त स्वास्थ्य सचिव डा. संगीता मिश्राको नाम पनि मन्त्रीका लागि सिफारिस गरिएको थियो । तर अन्तिम समयमा आएर उहाँको नाम ‘होल्ड’ भएको छ ।

गत भदौ २७ गते पूर्वप्रधानन्यायाधीश सुशीला कार्की प्रधानमन्त्री बनेकी थिइन् । प्रधानमन्त्री कार्कीसहित अहिले मन्त्रिपरिषद् आठ सदस्यीय बनेको छ ।

शपथग्रहण समारोहमा सभामुख देवराज घिमिरे, राष्ट्रियसभा अध्यक्ष नारायणप्रसाद दाहाल, प्रधानमन्त्री सुशीला कार्की लगायतका उच्च पदस्थ व्यक्तिहरू सहभागी भए ।