पोखरा ।
पोखरामा कबाडीजन्य सामानको खरिद–विक्री र निकासी गर्दै आएका व्यवसायीहरूले महानगरपालिकासँग कर असुल्ने ठेक्का पाएको कम्पनीका प्रतिनिधिले गैरकानुनी दबाब सिर्जना गर्दै सम्झौताभन्दा बढी दस्तुर माग गरेको आरोप लगाएका छन् ।

मंगलबार पोखरामा पत्रकार सम्मेलन गरी एड्रियन मल्टीप्रपोज कन्स्ट्रक्शन प्रालिका सञ्चालक रविन गुरुङ, जिपीएस सप्लायर्सका गिर बहादुर पुन, सुजित मुल्मी, प्रदिप गुरुङ, प्रदिप बस्नेत, एलजी सेक्युरिटी सर्भिसेज प्रालिका विवेक गुरुङ र राहुल गुरुङलगायतका व्यवसायीहरूले संयुक्त विज्ञप्ति जारी गर्दै ठेकेदार कम्पनी पिएल कन्स्ट्रक्सनमाथि सम्झौताभन्दा बढी कर असुल्ने प्रयास गरेको आरोप लगाएका हुन् ।

व्यवसायीहरूले भनेअनुसार पिएल कन्स्ट्रक्शनले पोखरा महानगरपालिकाबाट करिब १४ करोड ८० लाख रुपैयाँमा ठेक्का पाएकाे हाे । सम्झौताअनुसार महानगरमा संकलित फोहोर आयात हुँदा प्रतिकेजी ३ रुपैयाँ दरले कर असुल्ने कानुनी व्यवस्था छ । तर ठेक्का पाएको कम्पनीले अतिरिक्त रकम माग गरेको सञ्चालक रविन गुरुङले बताए । उनले आफूहरू २५ व्यवसायीको समूह रहेको उल्लेख गर्दै संविधानले दिएको मौलिक हकअधिकार र प्रचलित कानुनअनुसार व्यवसाय गर्दै आएपनि अतिरिक्त रकम मागेर हैरानी पारिएको पत्रकार सम्मेलनमा बताए । तर, ठेक्का पाएकाे पिएलका प्रेमपहारीले आफूहरूले त्यसरी अतिरिक्त रकम नलिएकाे समाधानलाई बताए ।

तर ठेकेदार कम्पनीले सम्झौताभन्दा बढी कर मागेर हाम्रो हक अधिकार कुण्ठित गर्ने प्रयास गरेको पत्रकार सम्मेलनमा सञ्चालक गुरुङले बताए ।

उनले तोकिएको कर तिर्न व्यवसायीहरूलाई कुनै आपत्ति नभएको स्पष्ट पारे । पोखरा विजयपुर नजिकै रहेको मेगा टेकमा कबाडीजन्य सामान तौल गरी महानगरले तोकेको दरअनुसार प्रतिकेजी ३ रुपैयाँ कर बुझाउँदै आएको उनले जानकारी दिए । ‘तर, ठेकेदार कम्पनीले थप ४ रुपैयाँ कर मागेपछि हामी पत्रकार सम्मेलन गर्न बाध्य भयौं,’ उनले भने ।

यद्यपि, उनले अतिरिक्त रकम मागिएको प्रमाण प्रस्तुत गर्न सकेनन । विज्ञप्तिमार्फत पनि ठेकेदार कम्पनीले धम्कीपूर्ण व्यवहार गर्दै कर्मचारीमार्फत दबाब दिने काम भइरहेको गुरुङले दाबी गरे । ‘हामीले तोकिएको दरअनुसार कर बुझाउँछौं भन्दा गुण्डा र भरौटे भन्ने जस्ता शब्द प्रयोग गरी अपमान गरिएको छ,’ उनले भने । यसअघि पनि यस्तै विवाद भएपछि रामबजार प्रहरी कार्यालयमा मिलापत्र भएको उनले सुनाए ।
व्यवसायीहरूले कबाडीजन्य सामानको वर्गीकरण गरी पुनः प्रयोग हुने सामग्री उद्योगमा पठाउँदा कानुनअनुसार राजश्व र कर बुझाउँदै आएको उनले बताए ।
गुरुङका अनुसार पोखरामा हाल १६० भन्दा बढी कबाड संकलन केन्द्र रहेका छन्, जसमा उनीहरूको मात्र २५ बढी केन्द्र सञ्चालनमा छन् । ‘हामी कबाड संकलन गर्ने होइनौं, संकलन भएको कबाड खरिद गरेर लोडरमार्फत पर्सा, भैरहवा, सिमरा र विराटनगर पु¥याउँछौं,’ उनले भने ।

उनका अनुसार सबैभन्दा बढी कारोबार हुने सामग्री फलाम हो । त्यसपछि तामा र पित्तल जस्ता धातुहरू बढी पाइन्छ । ‘हामी कबाड संकलनकर्ताबाट प्रतिकेजी १५–१६ रुपैयाँमा किन्छौं । त्यसपछि राज्यलाई कर भ्याटबाहेक प्रतिकेजी ३ रुपैयाँ बुझाउँछौं, लोडरलाई तिर्छौं, अनि सबै खर्च कटाउँछौं । यसरी गर्दा हामीलाई प्रतिकेजी ५०–७५ पैसा मात्र मुनाफा हुन्छ,’ उनले भने ।

तर ठेकेदार कम्पनीले प्रतिकेजी ४ रुपैयाँ अतिरिक्त माग्दा आफूहरू ठुलो अन्यायमा परेको उनको दाबी छ । ‘हामीसँग यति धेरै खर्च हुन्छ । यस्तो अवस्थामा अझै बढी कमिसन तिर्नुपर्ने हो भने व्यवसायी टिक्नै सक्दैन,’ उनले भने ।

गुरुङका अनुसार पोखराबाट दैनिक ६–८ ट्रक कबाड बाहिर पठाइन्छ । फलाम मात्रको कारोबार दैनिक १ करोडदेखि १ करोड ८० लाख रुपैयाँसम्म हुने गरेको उनले सुनाए । यस्तो अवस्थामा ठेकेदार कम्पनीको मनपरीले आर्थिक गतिविधि नै अवरुद्ध भएको उनको भनाइ छ ।