पोखरा । अटोमोबाइल व्यवसायमा लामो अनुभव हासिल गरेका व्यवसायी प्रमेश पराजुली र डिल्लीराज सुवेदी (शिशिर) अब विश्वप्रसिद्ध विद्युतीय कार ब्रान्ड बिवाइडीसँग आबद्ध भएका छन् । उनीहरूले पोखरा क्षेत्रमा बीवाईडी गाडीको आधिकारिक डिलरसिप प्राप्त गर्दै ‘स्वस्तिक इंक प्रालि’मार्फत बिक्री सुरु गरेका हुन् ।

यसअघि बिवाईडीका लागि नेपालको आधिकारिक आयातकर्ता साइमेक्स इंक प्रालिले पोखरामा आफ्नै स्वामित्वमा शोरुम सञ्चालनमा ल्याएको थियो । अब भने बुद्धचोकस्थित उक्त अत्याधुनिक शोरुम ‘स्वस्तिक इंक’ अन्तर्गत रहनेछ ।

पराजुली र सुवेदी अटोमोबाइल व्यवसायमा सफल व्यवसायीका रूपमा परिचित छन् । उनीहरूको संयोजनमा बिवाइडी पोखरामा थप लोकप्रिय बन्ने विश्वास गरिएको छ । कम्पनीले बिक्रीसँगै बिक्रीपछिको सेवामा पनि विशेष प्राथमिकता दिने प्रतिबद्धता जनाएको छ ।

१२ हजार ८ सय ४५ वर्गफुट क्षेत्रमा फैलिएको बुद्धचोकस्थित शोरुम नवीनतम कर्पोरेट आइडेन्टिटी र भिजुअल आइडेन्टिटी मापदण्ड अनुसार पूर्ण रूपमा अपडेट गरिएको छ । यो शोरुमबाट ग्राहकले सेल्स, सर्भिस र स्पेयर पार्ट्स (थ्रीएस) सुविधा एकै स्थानमा पाउनेछन् ।

साइमेक्स इंकले पोखरालाई दीर्घकालीन रणनीतिक बजारका रूपमा लिएको बताउँदै कम्पनीका प्रमुख कार्यकारी अधिकृत साहिल श्रेष्ठले नयाँ शोरुम र प्रिमियम गुणस्तरका उत्पादनले पोखराका ग्राहकलाई उत्कृष्ट सेवा दिने विश्वास व्यक्त गरेका छन् ।

नेपाली बजारमा बिवाइडीले अट्टो ३, अट्टो २, अट्टो १, सिलायन ७, एम ६, सिल र डल्फिनजस्ता मोडल उपलब्ध गराएको छ । इन्ट्री–लेभलदेखि प्रिमियम सेगमेन्टसम्मका गाडी उपलब्ध गराउँदै बिवाइडी नेपाली बजारमा क्रमशः लोकप्रिय बन्दै गएको छ ।