काठमाडौँ। प्रधानमन्त्री सुशिला कार्कीले जेनजी आन्दोलनका क्रममा ज्यान गुमाएका परिवारका सदस्यलाई घरमै पुगेर भेटघाट तथा सान्त्वना दिएकी छन् ।

उनी आज काठमाडौँ महानगरपालिका–१६, वनस्थलीस्थित सौरभकुमार श्रेष्ठको घर, नागार्जुन–३, स्वयम्भुस्थित कान्छी नगरकोटीको घर र कीर्तिपुर–२, मैत्रीनगरस्थित बुद्धिबहादुर तामाङको घरमा पुगेकी थिइन् । भेटका क्रममा प्रधानमन्त्री कार्कीले सहिदको सपना पूरा गर्न सरकार प्रतिबद्ध रहेको भन्दै त्यस्ता सपना खेर जान नदिने दृढता व्यक्त गरिन् ।

पीडित परिवारसँग कुराकानी गर्दै उनले समस्या परे सरकारलाई जानकारी दिन आग्रह गर्दै राज्य पीडित परिवारको रेखदेखमा ख्याल गर्ने बताइन् । प्रधानमन्त्रीसँगै सञ्चार तथा सूचना प्रविधिमन्त्री जगदिश खरेल पनि मृतकका परिवारसँगै भेटघाटमा सहभागी थिए ।

सो अवसरमा प्रधानमन्त्री कार्की र मन्त्री खरेलले मृतकप्रति श्रद्धाञ्जली अर्पण गर्दै तस्बिरमा माल्यार्पण गरे । परिवारका सदस्यले आफ्ना समस्या प्रधानमन्त्रीलाई प्रत्यक्ष रूपमा सुनाउने मौका पाएको भन्दै केही राहत महसुस भएको प्रतिक्रिया दिएका छन् । ‘सरकार भएको अनुभूति अहिले भएको छ’ भन्ने भावनासहित परिवारले प्रधानमन्त्रीको उपस्थितिलाई विशेष मान्यता दिएका छन् ।