काठमाडौँ । बङ्गालको खाडीबाट आएको जलवाष्पयुक्त मनसुनी वायुको प्रभाव अहिले देशभर रहेका कारण अधिकांश स्थानमा वर्षा भइरहेको छ । मौसम पूर्वानुमान महाशाखाका अनुसार मनसुनी वायु सक्रिय रहेकाले आज दिनभर र रातिसम्म देशका विभिन्न भागमा मध्यमदेखि भारी वर्षाको सम्भावना छ ।

आज बिहान कोशी, मधेस, बागमती र गण्डकी प्रदेशका अधिकांश स्थानहरूमा पूर्ण बदली रही बाँकी भूभागमा सामान्य बदली रहेको महाशाखाले जनाएको छ । मधेस, बागमती र लुम्बिनी प्रदेशका धेरै स्थानहरूमा मध्यम वर्षा भइरहेको छ भने कोशी र गण्डकी प्रदेशका धेरै ठाउँमा हल्कादेखि मध्यम वर्षा जारी छ ।

दिउँसोतिर कोशी र मधेस प्रदेशका अधिकांश स्थानहरूमा पूर्ण बदली रहने, बागमती र लुम्बिनी प्रदेशमा सामान्यतया बदली र बाँकी प्रदेशहरूमा आंशिक बदली रहने पूर्वानुमान गरिएको छ । यस अवधिमा कोशी र मधेस प्रदेशका धेरै स्थानहरूमा र अन्य प्रदेशका पहाडी तथा तराई भूभागका केही भागमा चट्याङसहित मध्यम वर्षा हुने सम्भावना छ । साथै, कोशी र मधेस प्रदेशका एक–दुई स्थानमा भारी वर्षा हुन सक्ने चेतावनी दिइएको छ ।

आज राति पनि कोशी, मधेस, बागमती प्रदेशलगायत देशका पहाडी भूभागमा सामान्यतया बदली रहने र केही स्थानहरूमा चट्याङसहित मध्यम वर्षा जारी रहने सम्भावना छ । कोशी प्रदेशका पहाडी भागका एक–दुई स्थानमा भने भारी वर्षा हुन सक्ने पूर्वानुमान महाशाखाले गरेको छ ।

वातावरणविद्हरूले पछिल्ला दिनहरूमा मनसुनी वायु सक्रिय बनेकाले केही प्रदेशमा जल तथा पहिरो जोखिम बढ्न सक्ने चेतावनी दिँदै सावधानी अपनाउन आग्रह गरेका छन् ।