काठमाडौँ । अविरल वर्षाका कारण हिजोदेखि स्थगित आन्तरिक हवाई उडान आज बिहानैदेखि पुनः सञ्चालनमा आएका छन् । त्रिभुवन अन्तर्राष्ट्रिय विमानस्थल कार्यालयका अनुसार मौसम अनुकूल बनेसँगै काठमाडौंबाट नेपालगञ्ज र भद्रपुरतर्फका उडान बिहानैदेखि भएका छन् ।

विमानस्थलका प्रवक्ता क्याप्टेन सुदर्शन बारालका अनुसार पोखरा र सुर्खेत क्षेत्रको मौसम पनि हवाई उडानका लागि अनुकूल बनेपछि अन्य गन्तव्यतर्फ पनि क्रमशः उडान सञ्चालन गर्ने तयारी भइरहेको छ ।

हिजोको दिनभर देशका विभिन्न भागमा भारी वर्षा र कम दृश्यता भएका कारण सबै आन्तरिक उडान रोकिएका थिए । तर, आज बिहानदेखि मौसममा सुधार आएपछि हवाई सेवा पुनः सञ्चालनमा आएको विमानस्थलले जनाएको छ ।

यसबीच, अन्तर्राष्ट्रिय उडान भने हिजो बेलुकीदेखि नै नियमित रूपमा सञ्चालन भइरहेका छन् ।