काठमाडौं । शनिबार र आइतबार लगातार परेको अविरल वर्षाले देशभर भीषण जनधन क्षति पुर्‍याएको छ । सशस्त्र प्रहरी बलका ताजा तथ्याङ्कअनुसार दुई दिनको वर्षाबाट ३९ जनाको ज्यान गएको छ, ११ जना बेपत्ता छन् र १३ जना घाइते भएका छन् ।

सबैभन्दा बढी क्षति कोशी प्रदेशमा भएको सशस्त्र प्रहरीको तथ्याङ्कले देखाएको छ । कोशीमा मात्रै ३६ जनाको मृत्यु भएको छ । जसमध्ये इलाममा २७ जनाले ज्यान गुमाएका छन् । इलाममै पाँच जना बेपत्ता र एक जना घाइते भएका छन् । त्यसैगरी उदयपुरमा दुई जनाको मृत्यु र एक जना घाइते भएका छन् भने खोटाङमा एक जनाको मृत्यु र तीन जना घाइते भएका छन् । पाँचथरमा पनि ६ जनाको ज्यान गएको छ र ६ जना घाइते भएका छन् ।

मधेश प्रदेशको रौतहटमा ३ जनाको मृत्यु भएको छ भने बारामा एक जना बेपत्ता छन् । बागमती प्रदेशअन्तर्गत रसुवामा ४ जना र काठमाडौंमा एक जना बेपत्ता भएका छन् । मकवानपुरमा एक जना घाइते भएका छन् ।

देशका विभिन्न स्थानमा अझै वर्षा भइरहेकाले पहिरो, बाढी र डुबानको जोखिम कायम रहेको बताउँदै स्थानीय प्रशासनले सर्वसाधारणलाई उच्च सतर्कता अपनाउन आग्रह गरेको छ ।