काठमाडौं — यस वर्षको वैशाखयता देशभर विभिन्न विपद्जन्य घटनामा परेर २८५ जनाले ज्यान गुमाएका छन् । राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार आइतबार (असोज १९)सम्मको विवरणअनुसार २७ जना अझै बेपत्ता छन् ।

प्राधिकरणकी प्रवक्ता शान्ति महतका अनुसार आइतबार मात्र ४४ जनाको मृत्यु भएको र पाँच जना बेपत्ता भएका छन् । उनले सबैभन्दा बढी इलाममा पहिरोका कारण ३७ जनाको ज्यान गएको र पछिल्लो मौसम प्रणालीबाट ५० जिल्ला प्रभावित भएको जानकारी दिइन् ।

प्राधिकरणले सार्वजनिक गरेको अभिलेखअनुसार वैशाखयता सबैभन्दा बढी सर्पदंशका कारण ८६ जनाको मृत्यु भएको छ । त्यस्तै, पहिरोमा ४६, चट्याङमा ४५, बाढीमा ३०, आगलागीमा २३, जनावरको आक्रमणमा २२, लेक लागेर १९, हावाहुरीमा आठ र भारी वर्षाबाट ६ जनाले ज्यान गुमाएका छन् ।

त्यसैगरी, बाढीका कारण २३ जना, पहिरोका कारण तीन र जनावरको आक्रमणबाट एक जना बेपत्ता भएका छन् ।

प्राधिकरणका अनुसार चालु वर्ष वैशाखयता देशभर ४ हजार ६५ वटा विपद्जन्य घटना दर्ता भएका छन् । ती घटनाबाट एक हजार ७२ जना घाइते र सात हजार २११ परिवार प्रभावित भएका छन् ।