पोखरा । भदौ २४ गतेको आगजनी र तोडफोडपछि कास्की कारागारबाट फरार भएका ७७३ जना कैदीबन्दीमध्ये हालसम्म ४६८ जना कारागार फर्किएका छन् । कारागार प्रमुख राजेन्द्र शर्माका अनुसार सोमबार साँझ ५ बजेसम्म उनीहरू स्वेच्छाले कारागारमा उपस्थित भएका हुन् ।

‘फर्कने क्रम अझै जारी छ,’ शर्माले भने, ‘राति आउनेहरूलाई समेत राख्ने व्यवस्था गरिएको छ ।’

कारागार प्रशासनले असोज १२ गते सूचना जारी गरी फरार कैदीबन्दीलाई असोज २० गतेभित्र कारागारमा फर्कन आग्रह गरेको थियो । सोमबार पुनः अर्को सूचना प्रकाशित गर्दै नफर्कने कैदीबन्दी र उनीहरूलाई लुकाउने, आश्रय दिने वा भगाउने व्यक्तिलाई कारवाही गरिने चेतावनी दिएको छ ।

कारागार कार्यालयका अनुसार नफर्कने, लुकाउने वा भगाउने व्यक्तिमाथि कारागार ऐन २०७९ तथा प्रचलित कानुनबमोजिम कारबाही हुनेछ । सूचना सहायक प्रमुख जिल्ला अधिकारी शिव लम्साल, जिल्ला प्रहरी कार्यालय कास्कीका डीएसपी हरिबहादुर बस्नेत र कारागार प्रशासक राजेन्द्र शर्मालाई जानकारी दिन आग्रह गरिएको छ ।

कारागार प्रमुख शर्माका अनुसार कारागारको प्रशासनिक अभिलेख र कम्प्युटरहरू जले पनि बन्दी गृह सुरक्षित भएकाले फर्केका कैदीबन्दीलाई राख्न समस्या छैन ।
‘हाम्रो रेकर्ड अनलाइनमा भएकाले राहत भयो,’ उनले भने, ‘कार्यालय जले पनि बन्दी गृह जोगिन सफल भयो ।’

कारागार ऐन २०७९ अनुसार, कारागारबाट भागेमा ५ वर्षसम्म कैद वा ५० हजार रुपैयाँसम्म जरिवाना वा दुवै सजाय हुनसक्छ । त्यस्तै, कसैले बन्दी भगाएमा ३ वर्षसम्म कैद वा ३० हजार रुपैयाँ जरिवाना वा दुवै सजायको व्यवस्था दफा ४९ मा उल्लेख छ ।

अहिले पनि ३०५ जना कैदीबन्दी फरार छन् र प्रशासनले उनीहरूका खोजतलास तथा निगरानीलाई तीव्र पारेको जनाएको छ ।