काठमाडौं। अख्तियार दुरुपयोग अनुसन्धान आयोगका प्रमुख आयुक्त प्रेमकुमार राई र अन्य आयुक्तहरूको सामूहिक राजीनामा माग गर्दै जेनजी मुभमेन्ट अलायन्सले सोमबार आयोगमै औपचारिक पत्र दर्ता गरेको छ ।

समूहले हिजो मात्र प्रमुख आयुक्त राईलाई इमेलमार्फत राजीनामाको आग्रह गरेको थियो । तर आज उनीहरू टंगालस्थित अख्तियार मुख्यालयमा भौतिक रूपमा पुगेर लिखित पत्र दर्ता गर्न पुगे ।

जेनजी मुभमेन्ट अलायन्सका नेता रिजन राना (आदित्य)ले भने, ‘हामीले आज उपस्थितिमै पत्र दर्ता गर्‍यौं । अब पनि राजीनामा नआए थप संघर्षका कार्यक्रम सञ्चालन गर्ने तयारी भइरहेको छ । अहिले त्यसबारे सल्लाह भइरहेको छ ।’

यसअघि अलायन्सले जारी गरेको विज्ञप्तिमा अख्तियार प्रमुख र अन्य आयुक्तहरूको नियुक्ति निष्पक्ष र लोकतान्त्रिक प्रक्रिया विना गरिएको आरोप लगाइएको छ । विज्ञप्तिमा भनिएको छ, ‘अख्तियार प्रमुख र आयुक्तहरूको नियुक्ति तत्कालीन प्रधानमन्त्री केपी शर्मा ओलीको सरकारले संसदीय सुनुवाइ नगरी गरेको थियो । त्यसले अख्तियारको स्वतन्त्रता र निष्पक्षतामाथि प्रश्न उठाएको छ ।’

समूहले विशेष अदालतको हालैको फैसलामा प्रमुख आयुक्त राईमाथि ‘स्वार्थ द्वन्द्व र चयनात्मक अभियोजन’को टिप्पणी आएको भन्दै उनको निष्पक्षता विवादास्पद भएको उल्लेख गरेको छ ।

जेनजी मुभमेन्ट अलायन्सले नेपाल आयल निगमको जग्गा खरिद, नक्कली भुटानी शरणार्थी प्रकरण र वाइडबडी विमान खरिदजस्ता ठूला विवादास्पद मुद्दामा प्रमुख आयुक्तको नाम जोडिँदै आएको भन्दै उनले नैतिक जिम्मेवारी स्वरूप राजीनामा दिनुपर्ने माग गरेको छ ।

समूहका अनुसार अहिले संघीय संसद् नहुँदा महाअभियोगमार्फत पदमुक्त गर्न सम्भव नभएकाले स्वेच्छिक राजीनामाबाटै अख्तियारको गरिमा पुनःस्थापना गर्न सकिने उल्लेख गरिएको छ ।

हाल ३९ जिल्लाबाट प्रतिनिधित्व गर्ने १२ वटा जेनजी समूहहरूको सहभागितामा जेनजी मुभमेन्ट अलायन्स गठन गरिएको छ ।