पोखरा । असोज २२ गते दिनको १ बजे बस्ने भनिएको गण्डकी प्रदेश सभाको बैठक तयारी नपुगेको भन्दै अन्तिम समयमा स्थगित भएको छ ।

प्रदेश सभाका सभामुख कृष्णप्रसाद धितालले कर्मचारीको बिदा अनि नयाँ ठाउँमा तयारी गर्नुपर्ने भएकाले समय अभावका कारण बैठक स्थगित गर्नुपरेको बताए ।

प्रदेश सभा हल र सचिवालय जलेर ध्वस्त भएपछि भूमि व्यवस्था कृषि तथा सहकारी मन्त्रालयको हलमा बैठक गर्न लागिएको थिए । सुरक्षा प्रवबन्ध सहित सिटको व्यवस्थाका साथै प्रत्यक्ष प्रशारणका लागि माइक र क्यामेराको प्रबन्ध गर्नु पर्ने हुन्छ । माइक जडान लगायतका कामसमेत नसकिएको सभामुख धितालले जानकारी दिए ।

प्रदेश सभाले जारी गरेको सूचनामा भनिएको छ, मिति २०८२ साल असोज २२ गते दिनको १:०० बजे बस्‍ने भनिएको गण्डकी प्रदेश सभाको बैठक सभाहलको प्राविधिक तयारी पुरा नभएको कारण अर्को सूचना नभएसम्मको लागि बैठक स्थगित भएको व्यहोरा अनुरोध छ।

सभामुख धितालले एमाले र कांग्रेसको केन्द्रीय समितिको बैठक समेत डाकिएकाले तिहार अघि प्रदेश सभाको बैठक सम्भव नदेखिएको बताए ।

गण्डकी विश्वविद्यालयमा उपकुलपति नियुक्तिका लागि सरकारले कानुन परिमार्जन गर्न विधेयक सदनमा दर्ता गराएको छ । खानी र गाँजा खेती सम्बन्धी विधेयक पनि सदनमा विचाराधीन छन् ।

भदौ २५ गते बस्ने गरी डाकिएको बैठक जेन्जी आन्दोलनका कारण अनिश्चित समयका लागि स्थगित गरिएको थियो ।