काठमाडौँ । सूर्यज्योति लाइफ इन्स्योरेन्स कम्पनी लिमिटेडले राष्ट्र र समुदायप्रतिको संस्थागत सामाजिक उत्तरदायित्व अन्तर्गत ‘भौतिक पूर्वाधार पुनर्निर्माण कोष’मा १ करोड ५० लाख रुपैयाँ सहयोग गरेको छ।

२०८२ भदौ २३ र २४ गते देशभर भएका जेन–जी आन्दोलनका क्रममा राजधानीसहितका विभिन्न सार्वजनिक तथा सरकारी भौतिक संरचनामा भएको आगजनी र तोडफोडबाट व्यापक क्षति भएको सन्दर्भमा नेपाल सरकारले स्थापना गरेको सो कोषमा कम्पनीले सहयोग प्रदान गरेको हो।

कम्पनीका सञ्चालक चुडामणि देवकोटा र प्रमुख कार्यकारी अधिकृत प्रकाश विक्रम खत्रीले आज अर्थमन्त्री समक्ष उक्त रकम बराबरको चेक हस्तान्तरण गरे ।

सहयोग हस्तान्तरणका अवसरमा प्रमुख कार्यकारी अधिकृत खत्रीले सूर्यज्योति लाइफले विगतदेखि नै शिक्षा, स्वास्थ्य र सामाजिक क्षेत्रमा निरन्तर सहयोग गर्दै आएको उल्लेख गर्दै हालको सहयोगले राष्ट्र पुनर्निर्माण, आर्थिक पुनरुत्थान र राहत प्रयोजनमा थप टेवा पुग्ने विश्वास व्यक्त गरे ।