पोखरा ।
कास्कीका युवा र विद्यार्थीले जेनजी आन्दोलनको क्रममा ऐतिहासिक धरोहर र प्रशासनिक भवनहरु आगजनी, तोडफोड र लुटपाट गर्नेलाई कानुनी कारवाही गर्न स्थानीय प्रशासनसमक्ष माग गरेका छन् ।

राष्ट्रिय युवा संघ नेपाल कास्की र अनेरास्ववियु कास्कीले आइतबार कास्कीका प्रमुख जिल्ला अधिकारी रुद्रादेवी शर्मालाई संयुक्त रुपमा ज्ञापनपत्र बुझाउँदै तोडफोड, आगजनी र लुटपाटमा संलग्नलाई यथाशीघ्र प्रकाउ गरी कानुनी कारवाहीको दायरामा ल्याउन माग गरेको हो ।

गत भदौ २३ र २४ गते भएको जेनजी आन्दोलनको क्रममा कास्कीका सरकारी कार्यालय, राजनीतिक दलका कार्यालय, व्यवसायिक प्रतिष्ठान, निजी आवास, सार्वजनिक पूर्वाधारहरु तोडफोड, आगजनी र लुटपाट भएको थियो । आन्दोलनको क्रममा भएका गतिविधिले मुलुकको कानुनी व्यवस्था, राष्ट्रिय सम्पत्ति र जनताको सुरक्षामाथि गम्भीर चुनौती खडा गरेको उल्लेख गर्दै ज्ञापनपत्रमा दोषीलाई कारवाही नगरे आन्दोलन गर्ने चेतावनी दिइएको छ ।

‘राजनीतिक आवरणमा योजनाबद्ध रुपमा अराजक तत्वहरुले गरेको गतिविधिले हिंसा, अपराधका घटना हुनुका साथै राष्ट्रिय अस्थिरता बढाउने काम भएको छ,’ ज्ञापनपत्रमा भनिएको छ, ‘यस्ता किसिमका गतिविधिले नेपालको लोकतान्त्रिक प्रणाली, सामाजिक सद्भाव र राष्ट्रिय एकतालाई कमजोर बनाएको छ ।’ आगजनी, तोडफोड र लुटपाटका घटनाले सार्वजनिक सेवा प्रवाह, प्रशासनिक काम कारवाही र शिक्षा प्रणाली अवरुद्ध बनेको उल्लेख गर्दै ज्ञापनपत्रमा त्यस्ता खालका अपराधमा संग्लनलाई कडा भन्दा कडा कारवाहीका लागि जोडदार माग गरिएको छ ।
अनेरास्ववियु कास्की अध्यक्ष सन्तोष पोखरेलले हिंसा, तोडफोड, आगजनी, लुटपाटको घटनाले देश र समाजलाई त्रासपूर्ण बनाएर शान्ति सुरक्षालाई कमजोर बनाउने बताए । राष्ट्रिय युवा संघ नेपाल कास्कीका अध्यक्ष उमेश गुरुङले अपराधिक क्रियाकलापमा सहभागीलाई कानुनी कारवाहीको दायरामा नल्याए सरकारको कमजोरी प्रमाणित हुने दाबी गरे । उनले अपराधमा संग्लग्न व्यक्तिलाई संरक्षण दिएको खण्डमा निर्दोष नागरिक त्रासमा बस्न पर्ने र अपराधले बलियो जरो गाड्ने उल्लेख गरे ।

आन्दोलनका क्रममा देशका विभिन्न कारागारबाट बाहिरिएका कैदी, बन्दीबाट भएको अपराधिक घटनाले मुलुकको आन्तरिक सुरक्षा थप चुनौतीपूर्ण भएको चर्चा गर्दै ज्ञापनपत्रमा नेपाल प्रहरीको लुटपाट भएको बर्दी, हतियार र संवेदनशील सुरक्षाका सामाग्री समेत दुरुपयोग भएर अपराधिक घटना बढ्ने चिन्ता जाहेर गरिएको छ । कास्कीका प्रमुख जिल्ला अधिकारी शर्माले युवा विद्यार्थीको मागलाई सकारात्मक रुपमा लिएर कानुनी कारवाही अगाडि बढाउने प्रतिबद्धता व्यक्त गरिन् ।