पोखरा ।
स्थापनाको ४६ औं वार्षिकोत्सवको अवसरमा सृजना विकास केन्द्र, पोखराको ४८औं साधारण सभा तथा २४औं अधिवेशन शनिबार पोखरामा भएको छ । संस्था २०३७ साल असोज २५ गते स्थापना गरिएको हो ।

कार्यक्रमकी प्रमुख अतिथि राष्ट्रिय मानवअधिकार आयोग, पोखराकी प्रमुख नितु गर्तौलाले सामाजिक न्याय र मानवअधिकार सुनिश्चित नभएसम्म समाज र नागरिकको जीवनस्तर सुधार हुन नसक्ने बताइन् ।

उनले संस्थाले आफ्नो उद्देश्यअनुसार सामाजिक उत्तरदायित्वका साथ काम गरिरहेको उल्लेख गर्दै आगामी दिनमा पनि युवापुस्तालाई स्वयम्सेवी भावनाले सामाजिक न्यायका क्षेत्रमा सक्रिय हुन प्रोत्साहन गर्न आग्रह गरिन् ।

गर्तौलाले हाल देशमा देखिएको विषम परिस्थिति समाधानका लागि सामाजिक संघसंस्थाले नागरिकका हक अधिकारका क्षेत्रमा सचेतना अभिवृद्धि गर्नुपर्नेमा जोड दिइन् । सृजना विकास केन्द्रका अध्यक्ष बिष्णुप्रसाद बरालले ४६ वर्षको यात्रामा संस्थाले सामाजिक, आर्थिक, सांस्कृतिक, शैक्षिक तथा धार्मिक क्षेत्रमा उल्लेखनीय योगदान पुर्‍याएको बताए ।

उनका अनुसार संस्थाले गरिबी र पछौटेपन अन्त्यलाई आफ्नो मूल ध्येय बनाउँदै बहिरा विद्यालय स्थापना, जनप्रिय बहुमुखी क्याम्पस सञ्चालन, महिला लघुऋण परियोजना, द्वन्द्वपीडित बालगृह, खानेपानी योजना, सहकारी सञ्चालन लगायतका कार्यक्रम सफलतापूर्वक अघि बढाउँदै आएको छ ।

बरालले सृजना लघुवित्त कार्यक्रमलाई समयानुकूल रूपान्तरण गरी जाल्पा लघुवित्त वित्तीय संस्था लिमिटेडको रूपमा स्थापित गर्नु संस्थाको प्रमुख उपलब्धि रहेको बताए । साधारण सभामा महासचिव चन्द्र गिरीले आर्थिक वर्ष २०८१/८२ को वार्षिक प्रगति प्रतिवेदन प्रस्तुत गरे भने कोषाध्यक्ष अशोककुमार श्रेष्ठले आर्थिक प्रतिवेदन पेस गरे । दुवै प्रतिवेदन छलफलपछि सर्वसम्मत रूपमा पारित भएको सचिव बालकृष्ण बरालले जानकारी दिए ।