पोखरा ।
कवि एवं गीतकार शिव पलाँसको ‘म मर्दा को को मलामी आए’ बोलको नयाँ सांगीतिक गजल सार्वजनिक भएको छ । मृत्युबोधको भाव रहेको यो गजलमा मान्छेको दोहोरो चरित्र र हराउँदै गएको मानवताप्रति व्यंग्य पनि गरिएको छ ।

ध्रुपद गायनका विद्यार्थी केशव बादीको संगीत तथा स्वर रहेको गजललाई दीक्षित पौडेलले एरेन्ज गरेका हुन् भने सम्पूर्ण ताम्राकारले रेकर्डिङ गरेका छन् । गायनमा उदाउँदै गरेका वादीले गजलका शब्दमाथि न्याय हुने गरी संगीत सृजना गर्न र स्वर भर्न सम्पूर्ण कोशिश गरेको सुनाए ।

यो गजल पलाँस क्रिएसन युट्युब च्यानल सार्वजनिक गरिएको हो । अमेरिकाको नर्थ क्यारोलाइना निवासी गीतकार पलाँस २ दशकदेखि साहित्य लेखन र गीति सृजनामा निरन्तर क्रियाशील छन् । उनको ‘माया गर्नुको अर्थ’ नामको गीत सञ्चयनसमेत प्रकाशित छ ।

पलाँसका शब्दमा ख्याति प्राप्त कलाकार दीप श्रेष्ठ, कर्ण दास, शिशिर योगी, बिबी अनुरागी, सञ्जु थापा, प्रमोद खरेलदेखि नयाँ पुस्ताका समीक्षा अधिकारी, रचना रिमाल र बाल कलाकार अनुजा कडरियासम्मले संगीत र स्वर मिसाइसकेका छन् । पलाँसका माया गर्नुको अर्थ, बेहोशीमै छोडी गयौ, खोकी लाग्दा हर्राे, खुकुरीलाई अचानोमा, छोरी लगायतका गीत लोकप्रिय छन् ।