लमजुङ । लमजुङको मर्स्याङ्दी गाउँपालिका–८ घट्टेखोलामा एक युवक मृतावस्थामा फेला परेका छन्। मृतक चितवनको भरतपुर महानगरपालिका–१७ भुवनवस्तीका ३१ वर्षीय विकास परियार रहेका जिल्ला प्रहरी कार्यालय लमजुङले जनाएको छ।

परियार भदौ २२ गतेदेखि मर्स्याङ्दी गाउँपालिका–७ तरान्चेस्थित मामाघर आइतमान परियारको घरमा बस्दै आएका थिए। मंगलबार दिउँसो करिब साढे ४ बजे घट्टेखोलास्थित बाटो छेउमा उनको शव भेटिएको प्रहरी निरीक्षक तथा सूचना अधिकारी अभिषेक पाण्डेले जानकारी दिए।

मृतकका मामा आइतमानका अनुसार विकास परियार बिहानै घरबाट निस्किएका थिए। घटनास्थल मुचुल्का र प्रारम्भिक अनुसन्धानपछि शवलाई पोष्टमार्टमका लागि बेँसीसहरस्थित प्रदेश अस्पतालमा राखिएको प्रहरीले जनाएको छ।

परियार अत्यधिक मादक पदार्थ सेवन गर्ने गरेको प्रारम्भिक बुझाइ रहेको र घटना सम्बन्धमा थप अनुसन्धान भइरहेको प्रहरीले जनाएको छ।