पोखरा । मुस्ताङको थासाङ गाउँपालिका–१ टुकुचे हिमालको ‘हिडन भ्याली’ मा हिउँमा फसेका तीन विदेशीसहित १५ जनाको टोलीलाई उद्धार गर्न नेपाली सेना, सशस्त्र प्रहरी र नेपाल प्रहरीको संयुक्त टोली खटिएको छ । काठमाडौँको सेक्रेट हिमालय ट्रेड एण्ड एक्स्पिडिसन ट्राभल एजेन्सीबाट गएका तीन बेलायती महिला पर्यटकसहितको यो टोली सोमबारदेखि हिउँमा फसेको थियो ।

संसारको सातौँ अग्लो धौलागिरि हिमालको आधार क्षेत्र हुँदै मुस्ताङ प्रवेश गरेको यो टोली हिमपातका कारण समस्यामा परेको हो । उद्धारका लागि नेपाली सेनाको उच्च शिखर शिक्षालय, इन्द्रबक्स गण, नेपाल प्रहरी र सशस्त्र प्रहरीको १० जनाको टोली ‘हिडन भ्याली’ तर्फ प्रस्थान गरेको छ ।

मुस्ताङका प्रमुख जिल्ला अधिकारी (प्रजिअ) विष्णुप्रसाद भुषालले बुधबार मौसम केही अनुकूल भएकाले माथिल्लो क्षेत्रबाट पर्यटकहरू झर्दै गरेको र तलबाट थप सहयोगका लागि उद्धार टोली पठाइएको बताए । प्रजिअ भुषालका अनुसार, पर्यटकहरूसँग पर्याप्त खानेकुरा छ । उनले उद्धार टोलीलाई पैदल पुग्न दुई दिन लाग्ने जनाए । सडकबाट उद्धारको टोली प्रस्थान गरेको र हेलिकप्टरबाट समेत सम्भव भएसम्म उद्धार गरिने प्रजिअ भुषालले बताए ।

समुद्र सतहदेखि ५ हजार १ सय मिटर उचाइमा पर्ने ‘हिडन भ्याली’ मा ५ फिटभन्दा बढी हिउँ जमेको र बाक्लो हिमपात भइरहेको अवस्थामा पर्यटकहरू एक्लै फर्किंदा थप जोखिम हुने भएकाले उद्धारकर्मीको टोली पठाइएको प्रजिअ भुषालले बताए । बाक्लो हिमपातले पदमार्ग पुरिएको अवस्थामा पर्यटकलाई यात्रा गर्न समस्या हुने भएकाले हिउँ पन्छाउने उपकरणसहित टोली खटाइएको हो । हिमपातको सूचना पाएलगत्तै जिल्ला सुरक्षा समितिको बैठक बसेर टोली परिचालन गरिएको थियो ।

जिल्ला प्रहरी कार्यालय मुस्ताङले जनाएअनुसार, उद्धार गरिएपछि पर्यटकसहितको टोलीको स्वास्थ्य परीक्षण गरी ट्राभल एजेन्सीलाई जिम्मा लगाइनेछ । मुस्ताङका प्रहरी नायब उपरीक्षक छिरिङ किप्पा लामाले म्याग्दीको धौलागिरि पदमार्ग हुँदै थासाङ गाउँपालिका–१ मा अवस्थित धम्पुस लेकको रूटमा यसअघि पनि एक जर्मन पर्यटकसहित पथप्रदर्शक हराएको स्मरण गरे । करिब १९ दिनअघि धौलागिरि चक्रीय पदयात्रा क्षेत्रमा १२ महिना हिमपात हुने स्थानहरूमा भारी हिमपात हुँदा पर्यटकलाई समस्या पर्ने उनले बताए ।

म्याग्दी र मुस्ताङ जोड्ने लामो र साहसिक पदयात्राका लागि विदेशी पर्यटकहरूले धौलागिरि चक्रीय पदमार्ग रोज्ने गरे पनि भौगोलिक विकटता, पर्याप्त पूर्वाधार र संकेत चिन्हजस्ता न्यूनतम पूर्वाधारको अभावमा पर्यटकहरू सम्पर्कविहीन हुने गरेका छन् ।