काठमाडौं ।
एनसेलको नयाँ प्रमुख कार्यकारी अधिकृत (सिइओ)मा माइकल फोले नियुक्त भएका छन् । उनको नियुक्ति कात्तिक १५ देखि लागू हुनेछ ।

फोलेको नियुक्तिसँगै कार्यवाहक सिइओका रुपमा कार्यभार सम्हाल्दै आएका सैयद इनामुल कबिरले कम्पनीको प्रमुख वित्तीय अधिकृत (सिएफओ)को भूमिकालाई निरन्तरता दिने छन् । २ दशकभन्दा बढी दूरसञ्चार क्षेत्रमा नेतृत्वको अनुभव बोकेका फोलेले यस क्षेत्रका प्रमुख कम्पनीहरुमा कुशल नेतृत्वका साथ सफलता हाँसिल गरेका उल्लेखनीय रेकर्डहरु छन् ।

यसअघि फोले एयरटेलमा फ्रेन्च अफ्रिकाका प्रमुखको रूपमा कार्यरत रहँदै सातवटा फ्राङ्कोफोन अफ्रिकी बजारहरूको सञ्चालन जिम्मेवारी वहन गरेका थिए । त्यसअघि, उनले टेलिनोर पाकिस्तान (पिपी)का सिइओका रूपमा कार्य गर्दै कठिन व्यावसायिक परिस्थितिमा पनि कम्पनीलाई अगाडि बढाउँदै बजारमा अग्रणी वृद्धि, नाफा, र कर्मचारी संलग्नताका साथ उल्लेखनीय सफलता हाँसिल गरेका थिए ।

फोलेले टामिर माइक्रोफाइनान्स (हालको इजीपैसा, पाकिस्तान)को अध्यक्ष र टेलिनोर हेल्थका अध्यक्षको रूपमा पनि काम गरेका छन् । हाल उनी अफ्रिकाको अग्रणी एसेट माइक्रोफाइनान्स कम्पनी वाटु अन्तर्गतको वाटु डिआरसी एसए अध्यक्षका रुपमा कार्यरत छन् ।

फोलेले भने, ‘काठमाडौंमा एनसेलको यो जिम्मेवारी लिन पाउँदा म अत्यन्त खुसी र सम्मानित महसुस गरिरहेको छु । एनसेल, देशका लागि महत्वपूर्ण पूर्वाधार हो, जसले नेपाली जनताका लागि नयाँ अवसरहरू सृजना गर्दै, डिजिटल रूपान्तरणलाई अघि बढाउने, आर्थिक प्रतिस्पर्धात्मकता बढाउने र विदेशी लगानी आकर्षित गर्ने अपार सम्भावना बोकेको छ ।’

डिजिटल, एआई पावर्ड र सामाजिक सञ्जालको युगमा दूरसञ्चार कम्पनीहरूसेवा प्रदायकमात्र नभई समाजको डिजिटल संरचना बुन्ने भूमिकामा रहनुपर्ने उनको भनाइ छ । फोल म्याकगिल विश्वविद्यालयका स्नातक हुन् र इनसिडबाट उनले ग्लोबल म्यानेजमेन्ट एन्ड गभर्नेन्समा एक्सिक्युटिभ सर्टिफिकेटस् प्राप्त गरेका छन् । उनी क्यानडा, केन्या दुबैका नागरिक हुन् ।

एनसेल सन् २००४ मा स्थापना भई २००५ बाट सेवा प्रदान गर्दै आएको नेपालको पहिलो निजी मोबाइल सेवा प्रदायक कम्पनी हो । स्पेक्ट्रलाइट युके लिमिटेडका साथ एनसेल आम नेपाली उपभोक्तालाई नवीनतम र उत्कृष्ट सेवाहरु प्रदान गर्न प्रतिबद्ध छ ।

२०२३ मा बेलायत स्थित स्पेक्ट्रलाइट युके लिमिटेडले आजियाटा ग्रुप बरहाद अन्तर्गत रहेको आजियाटा युकेबाट रेनल्ड्स होल्डिङ्स लिमिटेडको सय प्रतिशत सेयर स्वामित्व लिएको थियो । रेनल्ड्सको एनसेलमा ८० प्रतिशत स्वामित्व छ । एनसेल नेपालको ठूला करदातामध्ये एक हो । स्थापनापश्चात कम्पनीले हालसम्म विभिन्न कर तथा शुल्कका रूपमा सरकारलाई ३ सय ६० अर्ब रुपैयाँभन्दा बढी तिरिसकेको छ ।