जोमसोम ।
मुस्ताङको घरपझोङ गाउँपालिका मुस्ताङले आधारभूत तह कक्षा ४ र ५ का विद्यार्थीका लागि स्थानीय पाठ्यक्रम निर्माण गरिरहेको छ । राष्ट्रिय पाठ्यक्रम प्रारुप २०७६ मा भएको व्यवस्था अनुसार आगामी नयाँ शैक्षिक सत्रदेखि गाउँपालिका अन्तर्गत रहेका सामुदायिक तथा संस्थागत विद्यालयमा स्थानीय पाठ्यक्रम लागू गर्ने तयारी गरिएको हो ।

चालु शैक्षिक सत्रमा यहाँको घरपझोङ गाउँपालिकाले आधारभूत तह कक्षा १ देखि ३ सम्मका लागि विद्यार्थीका लागि स्थानीय पाठ्यक्रम निर्माण गरी कार्यान्वयनमा ल्याइसकेको छ । स्थानीय ज्ञान, सीप, प्रविधि र संस्कृति भावी पुस्तालाई हस्तान्तरण गर्नमा सघाउ पु¥याउने उद्देश्यले थप कक्षाका लागि स्थानीय पाठ्यक्रम निर्माणको कार्य हुन लागेको घरपझोङ गाउँपालिकाका प्रमुख प्रशासकीय अधिकृत वेदहरि अधिकारीले जानकारी दिए ।

स्थानीय पाठ्यक्रमको खाका (ड्राफ्ट) तयार भइसकेको र त्यसपछि सम्पादन कार्यअघि बढाई पुस्तक छपाईका लागि अफसेटमा पठाइने जोमसोम स्थित जनहित माध्यमिक विद्यालयका शिक्षक कर्ण थकालीले बताए । यसअघि घरपझोङ गाउँपालिका स्थित जनहित माध्यमिक विद्यालयका शिक्षक प्रतिनिधि एवं स्थानीय स्रोत व्यक्ति कर्णबहादुर थकालीलाई पाठ्यक्रम निर्माणको जिम्मा दिएको थियो ।

मंगलबार यहाँ आयोजित घरपझोङ गाउँपालिकाद्वारा तयार पारिएको स्थानीय पाठ्यक्रममा आधारित पाठ्यक्रमको नमूना खाकाको प्रवोधिकरण गरियो । गाउँपालिकाका जनप्रतिनिधि, कर्मचारी, शिक्षक, पत्रकार, स्थानीयको रोहबरमा स्थानीय पाठ्यक्रमको प्रवोधीकरण गरिएको हो ।

शिक्षक थकालीद्वारा तयार पारिएको आधारभूत तह कक्षा ४ र ५ को पाठ्यक्रमलाई सुझावसहित अनुमोदन गरिएको घरपझोङ गाउँपालिकाका अध्यक्ष मोहनसिंह लालचनले सुनाए । शिक्षक कर्णबहादुरद्वारा तयार पारिएको पाठ्यपुस्तकमा गाउँपालिका भित्रका ऐतिहासिक, धार्मिक तथा सांस्कृतिक विषय वस्तु समेटिएका छन् । थकाली समुदायको बाहुल्य रहेको घरपझोङ गाउँपालिकामा थकाली धर्म, परम्परा र संस्कृतिलाई पुस्तान्तरण गर्ने गरी स्थानीय पाठ्यक्रमको खाका तयार पारिएको हो ।

पाठ्यक्रममा कृषि, पशुपालन र पर्यटन लगायतका बिषयलाई पनि पाठ्यक्रममा महत्वपूर्ण अंशको रुपमा समावेश गरिएको छ । थकाली समुदाय अन्तर्गत मनाइने त्युङ्ला, तेरमी र तोरन्ल जस्ता महत्पूर्ण चाडपर्वको महत्वबारेमा जानकारी दिने गरी स्थानीय पाठ्यक्रम निर्माणको खाका तयार पारिएको शिक्षक कर्णबहादुर बताउँछन् ।

पुस्तकमा थकाली पोशाक, थकाली वेशभूषा, रहनसहन, थकाली खानका परिकार र पर्यटकीय गन्तव्यसमेत समावेश गरिएको छ ।सदिंयौ कालदेखि चल्दै आएको मुखिया प्रथाको संस्कृतिलाई इतिहासका रुपमा पाठ्यक्रममा प्रष्ट्याउने कोशिस गरिएको छ । पुस्तकमा गाउँपालिका भित्रका प्राकृतिक सम्पदा, जैविक विविधता र वन्यजन्तुबारे शिक्षा दिने गरी खाका तयार पारिएको हो ।