पोखरा ।
देशलाई संविधान र लोकतन्त्रको मार्गमा फर्काउन नेकपा (एमाले)ले वडादेखि काठमाडौं उपत्यकासम्म सडक प्रदर्शन गर्न लागेको छ । प्रतिगामी षड्यन्त्रलाई परास्त गर्दै मुलुकलाई संवैधानिक व्यवस्थातर्फ फर्काउनका लागि एमालेले वडा, पालिका, जिल्ला तथा काठमाडौंमा जनप्रर्दशन गर्न लागेको हो ।

पार्टीको केन्द्रीय कमिटीको १०औं बैठकले निर्णय अनुसार कास्कीमा जनपरिचालन तथा जनप्रदर्शन गर्न लागेको एमाले कास्कीका अध्यक्ष बैनबहादुर अधिकारी क्षत्रीले जानकारी दिए । एमालेले प्रतिगामी षड्यन्त्रका विरुद्ध आगामी कात्तिक २२, २५, २९ र मंसिर ६ गते वडास्तरीय जनभेला, पालिका स्तरीय जनप्रर्दशन, जिल्ला स्तरीय जनसभा र जनप्रर्दशन र जनसभा गर्न लागेको छ ।

‘संविधानको रक्षा, प्रतिगामी षडयन्त्रको बिरुद्धमा वडादेखि जिल्लासम्म गर्न लागेको प्रर्दशनलाई प्रभावकारी बनाउन कार्ययोजना बनाएर कार्यान्वयन गरिने छ,’ उनले भने, ‘कास्कीका ७२ वडा, पालिका र जिल्लास्तरीय जनसभालाई मर्यादित र व्यवस्थित बनाइने छ ।’

एमाले जिल्ला कमिटी कास्कीले आयोजना गरेको कार्यक्रममा स्थायी कमिटीका सदस्य किरण गुरुङले वर्तमान सरकारको संरक्षणमा भइरहेका ज्यादती र उल्टो गतिका विरुद्ध एवं विघटित संसदको पुनस्र्थापना गर्दै देशलाई संविधान र लोकतन्त्रको मार्गमा फर्काउन जनआन्दोलनको विकल्प नरहेको बताए । प्रतिगमनको बाटो अवलम्बन गर्न खोजिएको दाबी गर्दै उनले जनपरिचालन र जनआन्दोलनका विभिन्न कार्यक्रमहरु तय गर्दै अघि बढ्न सिंगो पार्टीपंक्ति, संविधान र लोकतन्त्रका पक्षधर राजनीतिक दलहरु र आमनागरिकलाई आह्वान गरे ।

विदेशी हस्तक्षेपको बिरुद्धमा जुध्ने र आवाज उठाउने पार्टी अध्यक्ष केपी शर्मा ओली भएको दाबी गर्दै उनले एमाले र अध्यक्ष ओली सबैको तारो भएको आरोप लगाए । अहिलेको अवस्थामा पार्टी नेतृत्वको रक्षा गर्न पर्ने उल्लेख गर्दै उनले नेतृत्वको रक्षा भए देश र लोकतन्त्रको रक्षा हुने तर्क गरे ।

एमालेका स्थायी समितिका सदस्य खगराज अधिकारीले आम जनता सडकमा नआए अझै प्रतिक्रान्ति हुने दाबी गरे । संविधान अपहरण भएको उल्लेख गर्दै उनले जनताबीचमा सकारात्मक सन्देश पु¥याएर प्राप्त उपलब्धीको रक्षा गर्नु पर्ने बताए । उनले २०६२÷०६३ सालको आन्दोलन जस्तो तयारी गर्न पर्ने सुझाव दिए । नेता तथा कार्यकर्ता विचारले प्रशिक्षित भएको कारण अविचलित भएर लागेको जानकारी दिदै उनले पार्टी भित्रको आन्तरिक समिक्षा भन्दा देश जोगाउने र लोकतान्त्रको रक्षा गर्नु प्रमुख सवाल भएको तर्क गरे ।

पोलिटब्युरो सदस्य जगत विश्वकर्माले सबै प्रतिकुलता र चुनौतीलाई एमालेले सामना गर्ने बताए । कार्यक्रममा एमाले कास्कीका अध्यक्ष अधिकारी, उपाध्यक्ष भेषराज बराल, सचिव दर्शन लामा लगायतले बोलेका थिए ।