पोखरा ।
माधव वियोगी वाङ्मय प्रतिष्ठान नेपालद्वारा स्थापित माधव वियोगी साहित्य पुरस्कार–२०८२ नवलपुर जिल्ला गैंडाकोट निवासी सन्तकवि गोविन्दराज विनोदीलाई प्रदान गरिने भएको छ ।

माधव वियोगी वाङ्मय प्रतिष्ठान नेपालका अध्यक्ष नवराज बरालको अध्यक्षतामा शुक्रबार बसेको बैठकले सो निर्णय गरेको जानकारी प्रतिष्ठानका सचिव शिव त्रिपाठीले दिएका छन् । त्यस्तै गरी सोही बैठकले २०८२ कै माधव वियोगी सम्मान कास्कीका नाट्यकर्मी कृष्ण उदासी र लमजुङका आधुनिक बालसाहित्यकार रमेशचन्द्र घिमिरेलाई प्रदान गर्ने निर्णय भएको जनाइएको छ ।

सचिव शिव त्रिपाठीले दिएको जानकारी अनुसार विनोदीले उत्कृष्ट कविता–काव्य सिर्जना गरी नेपाली भाषासाहित्यको विशिष्ट सेवा गरेवापत तथा उदासी र घिमिरेले क्रमश नेपाली नाटक र आधुनिक बालसाहित्यको उन्नयनमा निरन्तर साधना गरेवापत सो पुरस्कार र सम्मानहरू प्रदान गर्न लागिएको हो ।

माधव वियोगी साहित्य पुरस्कारको राशि २५ हजार र सम्मानहरूको राशि ५/५ हजार रुपैयाँ छ । उल्लेखित पुरस्कार तथा सम्मानहरु छन्दनायक माधव वियोगीको जन्मदिनका अवसरमा यही कात्तिक २९ गते पोखरामा आयोजित विशेष कार्यक्रममा प्रदान गरिने छ ।