पोखरा । जेनजी आन्दोलनपछि अनिश्चित कालका लागि स्थगित भएको गण्डकी प्रदेशसभाको बैठक सोमबार बस्ने भएको छ । सोमबार १ बजे बस्ने बैठकका लागि आइतबार कार्यव्यवस्था समितिले कार्यसूची तय गरेको छ । सोमबारको बैठकमा शून्य समय राखिएको छ । त्यसपछि मुख्यमन्त्रीले संवोधन गर्ने भएका छन् । त्यसपछि गण्डकी विश्वविद्यालय ऐन संशोधन विधेयक सदनमा टेबल हुनेछ । गाँजा खेती सम्बन्धी विधेयक पनि टेबल गरिने सचिव गोविन्द पौडेलले जानकारी दिए । यसैगरी खानी तथा खनिजसम्बन्धी विधेयक निर्णयार्थ प्रस्तुत गर्नेगरी कार्यसूची तय भएको छ ।

भदौ २४ गतेको आगजनीबाट प्रदेशसभा र सचिवालयका भवनहरू पूर्ण रूपमा क्षतिग्रस्त भएपछि प्रदेशसभा बैठक बस्न सकेको थिएन । जेनजी आन्दोलनले निम्त्याएको यो क्षतिले गण्डकी प्रदेशको विधायिकी प्रक्रियामा ठूलो असर पारेको छ । यसअघि असोज १८ गते सभामुख धितालले सूचना जारी गरेर असोज २२ गतेका लागि बैठक आह्वान गरे पनि अन्तिम समयमा पुनः स्थगित हुन पुगेको थियो ।

जेनजी आन्दोलनले गण्डकी प्रदेशमा विशेषगरी युवा पुस्ताको असन्तुष्टि र आक्रोशलाई उजागर गरेको थियो । आन्दोलनका क्रममा भएको आगजनी र तोडफोडले सरकारी सम्पत्तिमा ठूलो क्षति पु¥याउनुका साथै प्रदेशको समग्र प्रशासनिक कार्यमा अवरोध सिर्जना गरेको थियो । प्रदेश सरकारका अन्य कार्यालयले सरसफाइ र मर्मत गरी काम थाले पनि प्रदेशसभाका भवनहरू भने तत्काल प्रयोगमा आउने अवस्थामा छैनन् ।

प्रदेशसभाका सचिव गोविन्द पौडेलले मालेपाटनस्थित कृषि, भूमि व्यवस्था तथा सहकारी मन्त्रालयको हलमा संसद बैठकका लागि आन्तरिक व्यवस्थापन सकिएको जानकारी दिए । सदन कति दिन चलाउने भन्ने बारेमा सदनमा रहेका दलका नेताहरुबीतको छलफलपछि टुंगो लाग्ने छ ।