सुन्दरकुमार थकाली

जोमसोम ।

मुस्ताङको कोबाङ–जोमसोम सडक खण्ड आठ वर्षदेखि अलपत्र छ । राष्ट्रिय गौरवको यो आयोजनाको काम पूरा नहुँदा स्थानीय, पर्यटक र यात्रुले सास्ती खेप्नुपरेको छ । निर्माण कम्पनीको ढिलासुस्तीका कारण सडकको काम रोकिएको छ । अहिले यसको म्याद सातौँ पटक थप्ने प्रक्रिया अघि बढेको छ ।

बेनी–जोमसोम सडकको कुल लम्बाई ७४ किलोमिटर छ । त्यसमध्ये कोबाङ–जोमसोम खण्ड करिब १७ किलोमिटर पर्छ । यो खण्डको काम आठ वर्षदेखि रोकिएको छ । घाँसाबाट माथिल्लो भेगसम्म कालोपत्रे भइसकेको छ । तर, कोबाङ–जोमसोम खण्डका तीन स्थानमा अझै काम बाँकी छ ।

यो सडक बेनी–जोमसोम–कोरला सडक आयोजना अन्तर्गत पर्छ । विसं २०७३÷७४ मा चार खण्डमा ठेक्का सम्झौता भएको थियो । कोबाङ–जोमसोम खण्डको ठेक्का पप्पु–गौरी पार्वती कोशी एन्ड न्यौपानी जेभीले पाएको थियो । ११ मिटर चौडा सडक र कालोपत्रेका लागि ७० करोड रुपैयाँको लागतमा सम्झौता भएको थियो ।

सुरुमा निर्माण कम्पनीले काममा तीव्रता दिएको थियो । तर, पछि काममा ढिलासुस्ती भयो र काम रोकियो । लामो समयसम्म काम नभएपछि आयोजनाले निर्माण कम्पनीलाई कारबाही प्रक्रिया अघि बढाएको थियो । आयोजनाको बारम्बारको ताकेता र कारबाहीको धम्कीपछि जेभीको मुख्य कम्पनी गौरी पार्वतीले कामको जिम्मा लियो । तर, कम्पनीले आंशिक रुपमा मात्र काम गरेको छ । निर्माण कम्पनीको लापरबाहीले कामले गति लिन सकेको छैन ।

आयोजनाले कम्पनीलाई कुल ठेक्का सम्झौता लागतको शून्य दशमलव शून्य पाँच प्रतिशत जरिबाना लगाएको छ । आयोजनाका सूचना अधिकारी इन्जिनियर बाबुसाहेव बैठाका अनुसार, कोबाङ–जोमसोम सडकको म्याद सातौँ चरणमा थप्ने प्रक्रिया अघि बढेको छ । हालसम्म भौतिक प्रगति ९० प्रतिशत र वित्तीय प्रगति ८० प्रतिशत छ ।

गौरी पार्वती निर्माण कम्पनीका प्रतिनिधि सुमन अधिकारीका अनुसार, थासाङ गाउँपालिकाको टुकुचेमा ४०० मिटर कालोपत्रे र ३०० मिटर आरसिसी प्रविधिको सडक विस्तार बाँकी छ । यस क्षेत्रमा कालोपत्रे र आरसिसी प्रविधिको ’ड्रेन’ र ’स्ट्रक्चर’को काम सकिएको छ ।

मार्फा राजखोलाको पक्की पुलबाट माथिल्लो क्षेत्रमा करिब १ हजार २०० मिटर कालोपत्रे गर्न बाँकी छ । जोमसोमको पुथाङ विमानस्थल माथिबाट नेपाली सेनाको ब्यारेकसम्म करिब ५०० मिटर सडकमा ‘स्ट्रक्चर’ र कालोपत्रे गर्न बाँकी छ ।

कम्पनीका प्रतिनिधि अधिकारीले मंसिर मसान्तसम्म कोबाङ–जोमसोम सडकको सबै काम सकिने दाबी गरे । उनले भने, ‘हामीले जिम्मा लिएपछि कामलाई तीव्रता दिएका छौँ । सोही अनुसार काम पनि भइरहेको छ । अहिले कामदार धान काट्न घर गएकाले काम रोकिएको हो । अब एक हप्ताभित्रै कामले निरन्तरता पाउनेछ ।’ राष्ट्रिय गौरवको बेनी–जोमसोम अन्तर्गतको कोबाङ–जोमसोम सडक कालोपत्रे नहुँदा पर्यटक, स्थानीय, सवारीसाधन र पैदलयात्रीलाई समस्या भइरहेको छ । यो सडक पूरा भएपछि मुस्ताङ र म्याग्दीको सिमाना घाँसाबाट कागबेनी–मुक्तिनाथसम्मको आवागमन सहज हुनेछ ।