काठमाडौं ।
नेपाल टेलिकमको नाफा चालू आर्थिक वर्षको पहिलो त्रैमासिकमा १२.२९ प्रतिशतले घटेको छ । कम्पनीले यो अवधिमा ४ अर्ब ७५ करोड ४ लाख ७१ हजार रुपैयाँ मात्र नाफा गर्न सक्यो । गत वर्षको सोही अवधिको तुलनामा यो कमी हो ।

टेलिकमले जारी गरेको वित्तीय विवरणअनुसार यस त्रैमासिकमा कुल सञ्चालन आय ८ अर्ब ६७ करोड ९५ लाख १५ हजार रुपैयाँ रहेको छ । गत वर्षको यही अवधिमा कुल सञ्चालन आय ८ अर्ब ६८ करोड १ लाख ८६ हजार रुपैयाँ थियो । कुल आम्दानी ९ अर्ब ४७ करोड १० लाख ५१ हजार रुपैयाँ पुगेको छ ।

टेलिकमले ओटीटी सेवाहरूको बढ्दो प्रयोगलाई नाफा घट्नुको मुख्य कारण बताएको छ । ओटीटी सेवाका कारण विदेशबाट आउने कलको संख्यामा ठूलो असर परेको कम्पनीको भनाइ छ ।

कम्पनीको कर्मचारी खर्चमा पनि वृद्धि देखिएको छ । कर्मचारी बिमा खर्च १ करोड ९५ लाख रुपैयाँले बढेको छ । यसका साथै, नेपाल लेखामान १९ अनुसार योगदानमा आधारित पेन्सन योजनाको दायित्व गणनाका लागि प्रयोग भएको डिस्काउन्ट रेट ७.५ प्रतिशतबाट घटेर ७ प्रतिशतमा झरेको छ ।

यसले गर्दा कर्मचारी अवकाशसम्बन्धी खर्च १६ करोड ५० लाख रुपैयाँले बढेको छ । यी कारणले गर्दा कुल कर्मचारी खर्च ८ करोड ८० लाख रुपैयाँले वृद्धि भएको टेलिकमले जानकारी दिएको छ ।