पोखरा ।
तनहुँको घिरिङ गाउँपालिका ३ डाँडाथोकमा जन्मिएकी निरा थापा मगर यतिबेला लोक तथा दोहोरी गायन क्षेत्रमा लोकप्रिय नाम बनेकी छन् । सामान्य गाउँले परिवेशबाट संघर्ष गर्दै सांगीतिक यात्रा आरम्भ गरेकी उनी अहिले देशका विभिन्न ठाउँमा हुने मेला महोत्सव तथा सांस्कृतिक कार्यक्रमहरुमा निकै व्यस्त रहेकी छन् ।

आमा केशरी थापा र बुबा यामबहादुर थापामगरको कोखबाट जन्मिएकी निराले आफ्नो बाल्यकालको सपनालाई साकार पार्दै लोक दोहोरी पारखीमाझ आफूलाई स्थापित गराउन सफल भएकी हुन् ।

सानैदेखि अन्तरमुखी स्वभावकी भए पनि निरामा कलाकार बन्ने हुटहुटी थियो । गाउँमा हुने कार्यक्रममा कलाकारहरु स्टेजमा नाचेको र गाएको देख्दा आफू पनि भविष्यमा त्यसरी नै गाउने सपना बुनेकी थिइन् । सुरुवाती दिनमा आफ्ना रहरहरु परिवारलाई भन्न नसके पनि मेलापात र विद्यालयका कार्यक्रममा उनको स्वर सुनिसकेपछि साथीभाइ र छरछिमेकीले तारिफ गर्न थाले । पछि उनको गायन कलालाई परिवारले पनि राम्रो साथ दिएको उनी बताउँछिन् ।

गायन क्षेत्रमै भविष्य खोज्ने क्रममा वि.सं. २०७४ सालतिर पोखरा झरेकी निराले लगत्तै दोहोरी साँझबाट आफ्नो व्यावसायिक यात्रा सुरु गरिन् । ‘साइनो दोहोरी’ बाट काम सुरु गरेकी उनले ‘हाम्रो दोहोरी साँझ’, ‘भन्ज्याङ बुटिक दोहोरी साँझ’ हुँदै चिप्लेढुंगास्थित ‘गाउँसहर दोहोरी साँझ’ मा लामो समय काम गरिन् ।

पेसागत अनुभव बटुल्दै उनी अहिले काठमाडौंको ठमेलस्थित ‘गाउँबेसी दोहोरी नाचघर’ मा आबद्ध रहेर गायन यात्रालाई निरन्तरता दिइरहेकी छन् । पोखराबाट सञ्चालन हुने ‘रोधी अनलाइन टिभी’ मा लाइभ दोहोरी गाउन थालेपछि उनको चर्चा अझ चुलिएको हो ।

नेपाल मगर सांस्कृतिक संघ कास्कीको कार्यसमितिमा रहेर संस्थागत योगदान समेत गरेकी निराले २०७५ सालमा काठमाडौंमा आयोजित ‘इमेज लोक कलाकार सिजन २’ मा सहभागिता जनाएकी थिइन् । सो प्रतियोगिताले आफूलाई यस क्षेत्रमा लाग्न थप हौसला मिलेको उनी सम्झिन्छिन् । सांगीतिक यात्राकै क्रममा २०२३ को ‘मिस मगर इन्टरनेसनल’ मा उनी ‘फोर्थ रनर अप’ बन्न सफल भएकी थिइन् ।

अहिलेसम्म निराका ८ ओटा गीत बजारमा आइसकेका छन् । उनका ‘मलाई बैंसले पार्‍यो सत्यानास’, ‘फूलैमा महुरी’, ‘रोइला’, ‘रिसिङ्गे भेना’ (कौराहा), ‘मुस्ताङ बजार’ (सेलो) लगायतका गीतहरु चर्चित छन् । प्रायः आफ्नै युट्युब च्यानलबाट गीत सार्वजनिक गर्ने उनले आफ्ना गीतमा आफैं मोडलिङ समेत गर्दै आएकी छन् । यसबाहेक कौडा, तामाङ सेलो, आधुनिक गीत ‘हिमालको चिसो पाखाले’, ‘लेकैमा चौरी’ लगायतमा पनि उनले अभिनय गरेकी छन् ।

लोक गीतसंगीतसँग आफ्नो गहिरो सम्बन्ध रहेको बताउने निरा विशेष गरी सालैजो, कौडा र झ्याउरे जस्ता मौलिक भाका मन पराउँछिन् । अग्रज गायिका बिमाकुमारी दुराको गीत सुन्दा आनन्द आउने बताउँदै उनी भन्छिन्, ‘त्यसमा पनि सोलो प्याटर्नका गीतहरु बढी मन पराउँछु ।’ सुखमा मनोरञ्जन र दुःखमा पीर बिसाउने माध्यम संगीत नै भएको उनको बुझाइ छ ।

छोटो समयमै स्थापित गायिकाको छवि बनाएकी उनी अहिले पूर्वको ओखलढुंगादेखि पश्चिमका विभिन्न जिल्लाका स्टेज कार्यक्रममा पुगिसकेकी छन् । बागलुङ, म्याग्दी, स्याङ्जा, तनहुँ, नवलपरासी र हिमाली जिल्ला मुस्ताङसम्मका कार्यक्रममा उनी पुग्ने गरेकी छन् ।

अन्य कलाकारको तुलनामा व्यस्त देखिनुको कारण खुलाउँदै उनी भन्छिन्, ‘मगर समुदाय र मगर बस्ती बढी भएको गाउँ ठाउँमा सांस्कृतिक कार्यक्रमहरु बढी नै हुने गर्दछ, त्यसैले मगर भएको नाताले पनि सायद उहाँहरुले माया गरेर बोलाउनुहुन्छ र यो अवसर मैले पाएको छु ।’

दर्शक र स्रोताको माया नै कलाकारको ठूलो सम्पत्ति भएको बताउने निराले आफ्नो लाइभ दोहोरीलाई रुचाइदिएकोमा खुसी व्यक्त गरेकी छन् । गीत संगीतबाहेक अन्य विकल्प नसोचेको बताउने उनले आगामी दिनमा पनि यसै क्षेत्रमा सक्रिय रहने र अझ धेरै कुरा सिक्दै दर्शकमाझ पुग्ने अठोट लिएकी छन् ।