काठमाडौं । काठमाडौंबाट पोखराका लागि उडेको बुद्ध एयरको जहाजमा शनिबार चरा ठोक्किएको छ । पोखरा विमानस्थलमा अवतरण गर्ने क्रममा जहाजसँग चरा ठोक्किएको हो ।

घटनामा कुनै मानवीय क्षति भने भएको छैन । बुद्ध एयरका अनुसार उडान नम्बर ६१७ को ९ एन–एओसी जहाजमा सवार सबै यात्रु र चालक दलका सदस्यहरू सुरक्षित छन् ।

चरा ठोक्किएपछि जहाजमा के कति असर पर्यो भन्ने विषयमा अहिले पोखरास्थित प्राविधिक टोलीले जाँच गरिरहेको कम्पनीले जनाएको छ । प्राविधिक जाँचपछि मात्र जहाजको अवस्थाबारे विस्तृत विवरण आउनेछ ।

पोखरामा किन हुन्छ चराको जोखिम ?

पोखराको आकास र विमानस्थल आसपासमा पटक–पटक चरा ठोक्किने समस्या दोहोरिने गरेको छ । यसअघि पुरानो विमानस्थलमा पनि र नयाँ अन्तर्राष्ट्रिय विमानस्थल सञ्चालनमा आएपछि पनि यो चुनौती कायमै छ ।

पोखरा उपत्यकाको भौगोलिक अवस्थिति र विमानस्थल नजिकै रहेका सेती र विजयपुर खोलाका खोँचहरू चराका लागि प्राकृतिक बासस्थान र करिडोर हुन् । खोला किनार र आसपासका वनजंगलमा बास बस्ने चराहरू आहाराको खोजीमा निस्कँदा विमानको उडान र अवतरणको बाटो (अप्रोच मार्ग) मा पर्ने गरेका छन् ।

यसबाहेक, पोखरामा फोहोर व्यवस्थापनको चुनौतीले पनि विमानस्थल आसपास चराको गतिविधि बढाएको विज्ञहरू बताउँछन् । खुला ठाउँमा फालिने फोहोर र मरेका जनावर (सिनो) खान आउने गिद्ध तथा चीलजस्ता ठुला चराहरूले हवाई सुरक्षामा गम्भीर चुनौती खडा गर्ने गरेका छन् । विशेषगरी जाडोयाम सुरु भएसँगै बसाइँ सरेर आउने चराहरू र स्थानीय रैथाने चराहरूको गतिविधि विमानस्थल क्षेत्रमा बढ्ने गरेको पाइन्छ ।