पोखरा । काठमाडौंमा हुने नेकपा (एमाले) को ११ औं राष्ट्रिय महाधिवेशनका लागि स्याङ्जाबाट सहभागी हुने प्रतिनिधिहरूको टुंगो लागेको छ । जिल्लाबाट सहभागी हुने १५ जना प्रतिनिधि सर्वसम्मत चयन भएका हुन् ।

प्रतिनिधि बन्नका लागि ८४ जनाले आकांक्षा देखाए पनि दुई दिनको रस्साकस्सीपछि सबै नाममा सहमति जुटेको हो । एमाले स्याङ्जाका अध्यक्ष सूर्यप्रसाद गैह्रे (पारस) ले दुई दिनको छलफलपछि सर्वसम्मत नेतृत्व चयन गर्न सफल भएको बताए । उनका अनुसार छनोट भएका प्रतिनिधिहरूको नामावली आज (शनिबार) बिहान औपचारिक रूपमा सार्वजनिक गरिँदै छ ।

क्षेत्र नम्बर १ बाट को–को छानिए ?
स्याङ्जा संघीय निर्वाचन क्षेत्र नम्बर १ को खुलातर्फ नारायणप्रसाद मरासिनी, सुधिर पौडेल, महेश पुरी र चुनप्रसाद शर्मा महाधिवेशन प्रतिनिधि चयन भएका छन् ।

यस्तै महिलातर्फ चिनमाया गुरुङ र तारा शर्मा तथा युवा कोटामा अमृत नेपाली सर्वसम्मत छानिएका हुन् ।

क्षेत्र नम्बर २ र दलित क्लस्टर
संघीय क्षेत्र नम्बर २ को खुलातर्फ जिल्ला अध्यक्ष सूर्यप्रसाद गैह्रे, रामचन्द्र भट्टराई र खिमबहादुर थापा चयन भएका छन् । यहाँ महिलातर्फ खगीसरा थापा र भेमला बराल तथा ४० वर्षमुनिका युवातर्फ विश्वनाथ अर्याल प्रतिनिधि बनेका छन् ।

यसैगरी, दलित समुदाय (क्लस्टर) बाट मेघबहादुर सार्की र तिलकराम नेपाली चयन भएको एमाले स्याङ्जाको निर्वाचन समितिले जनाएको छ । एमालेको ११ औं महाधिवेशन आगामी मंसिरको अन्तिम साता काठमाडौंमा हुँदैछ ।