पोखरा ।
एमालेको ११ औं महाधिवेशनका लागि प्रतिनिधि छनोटमा नेताहरूले एकलौटी गरेको आरोप लगाउँदै कास्कीका असन्तुष्टहरुले उजुरी दिएका छन् । शनिबार स्थायी कमिटी सदस्य खगराज अधिकारीको अध्यक्षतामा बसेको बैठकले २३ प्रतिनिधि छनोट गरेपछि असन्तुष्ट पक्षले पार्टी कार्यालयमा ज्ञापनपत्र नै बुझाएको छ ।

उनीहरुले प्रतिनिधि छनोटमा नेताहरु हाबी भई आफ्ना मान्छेलाई मात्र प्रतिनिधि बनाएको भन्दै विरोध गरेका छन् । मतदाता संख्याका आधारमा प्रतिनिधि छनोट गरिन्छन । बैठकमा पोलिटब्युरो सदस्य जगत विश्वकर्मा, केन्द्रीय सदस्य चूडामणि जंगली, भीम कार्की, कृष्ण थापा, राजीव पहारी र मीनाकुमारी गुरुङ थिए ।

७ जनाले छनोटमा मन लाग्दी गरेको भन्दै अरु नेताहरुले असन्तोष पोखेका छन् । नेता सञ्जीव कोइरालाले फेसबुकमा लेखेका छन्, ‘हाम्रो पार्टी कति लोकतान्त्रिक छ । यो मेरो निवेदनलाई खोस्टो बनाइदिएकोमा नेता भेषराज बराल, कृष्ण थापा, जगत विश्वकर्मा र खगराज अधिकारीलाई हार्दिक बधाई !’

उनले प्रतिनिधि छनोटमा मतदान माग गरेका थिए । पूर्व कास्की जिल्ला कमिटी सदस्यसमेत रहेका प्रतिनिधि आकांक्षी विवेक त्रिपाठीले एमाले कास्की अध्यक्ष वैनबहादुर क्षेत्रीलाई ज्ञापनपत्र बुझाएका छन् । ‘आफूलाई छान्ने प्रतिनिधि आफैंले छानेर लाग्ने अभ्यास कुल्चिएर पार्टी विधि र प्रक्रियालाई समेत नेतृत्वले गुमराहमा राखी प्रतिनिधि छनोट भएकाले अविलम्ब निर्वाचन प्रक्रिया सुरु गर्नुपर्छ,’ विज्ञप्तिमा उल्लेख छ ।

निर्वाचित सांसद र जनप्रतिनिधिहरु छनोट नभएपछि त्यसले झनै चर्चा पाएको छ । निवर्तमान संघीय सांसदहरु दामोदर बैरागी र मनबहादुर गुरुङ प्रतिनिधि छानिएनन् । गण्डकी प्रदेशसभा सदस्यहरु प्रकाश केसी, गणेशमान गुरुङ, देवका पहारी, राजकुमारी भुजेल र नन्दकला नेपाली पनि प्रतिनिधि हुनबाट बञ्चित भएका छन् ।

एमाले कास्कीका एक सदस्यले अहिले कास्कीमा पृथ्वीसुब्बा(पिएस) गुरुङ र खगराज अधिकारी मिल्दा मतदान नभएको सुनाए । ‘हिजो सधैं गण्डकीमा पिएस गुट र खगराज गुट भनेर प्रतिस्पर्धा भए । अहिले केन्द्रीय नेतृत्वमा पार्टी अध्यक्ष केपी ओलीलाई जिताउन दुवै नेता एक ठाउँमा भएपछि प्रतिनिधि छनोटमा पनि आफ्ना मान्छेलाई चुनिएको हो,’ ती सदस्यले भने, ‘भोट दायाँबायाँ गर्ने शंका लाग्नेलाई प्रतिनिधिमा रोकिएको छ ।’

यी हुन् प्रतिनिधि
प्रतिनिधिमा कास्की १ खुलातर्फ टीकाराम पंगेनी, वैनबहादुर अधिकारी क्षेत्री, वेदबहादुर गुरुङ र दर्शन लामा छन् । महिलातर्फ विजया सुवेदी र नारायणी भट्टराई छानिँदा युवातर्फ नवराज ओझा चुनिए । क्षेत्र नम्बर २ को खुलातर्फबाट तेजनारायण अधिकारी, रामप्रसाद खनाल, भेषराज बराल र रश्मि आचार्य निर्वाचित हुँदा महिलातर्फ सुजना शर्मा र हिरा गिरी र युवातर्फ विजय पौडेल छन् ।

कास्की ३ बाट खुलातर्फ दीपक पौडेल, जगन्नाथ बास्तोला, माधव बास्तोला र लालबहादुर परियार, महिलातर्फ शोभा पहारी र गीता विश्वकर्मा र युवातर्फ भरतमान गुरुङ (कोने) निर्वाचित भएका हुन् । समग्र कास्कीको उत्पीडित क्षेत्रतर्फबाट दामबहादुर विक र प्रेम विश्वकर्मा छानिएका छन् ।