पोखरा । महिला हिंसा विरुद्धको १६ दिने अभियानका सन्दर्भमा आइतबार पोखरा बहुमुखी क्याम्पसमा लैंगिक हिंसा विरुद्ध सचेतना आयोजना गरिएको छ । लैंगिक हिंसाका बिभिन्न विषयमा विद्यार्थीलाई सचेत गराई समृद्ध समाज निर्माण गर्न सघाउ पुर्‍याउने उद्देश्यले सामुदायिक प्रहरी र पोखरा बहुमुखी क्याम्पसको सहकार्यमा कार्यक्रम आयोजना गरिएको हो ।

कार्यक्रममा लिंगका आधारमा महिला तथा पुरुषले भोग्नुपरेका समस्या उजागर गर्दै यस्तो हिंसाको शिकार धेरै मात्रामा महिला हुनुपरेको तथ्य प्रस्तुत गरिएको थियो । कार्यक्रममा बिभिन्न बहानामा महिलाले भोग्नुपरेका शारीरिक, मनोवैज्ञानिक, सामाजिक, आर्थिक, जातीय लगायतका हिंसाका स्वरुप, कारण र रोकथामका उपाय प्रस्तुत गरिएको थियो ।

जिल्ला प्रहरी कार्यालय कास्कीका प्रमुख प्रहरी उपरीक्षक नवीन कार्की, सामुदायिक प्रहरी सेवाका वरिष्ठ प्रहरी नायब निरीक्षक होतबहादुर रोका, प्रहरी हवल्दार श्री काफ्ले लगायतले सहजीकरण गरेका थिए । उनिहरुले यस्ता हिंसा तथा अपराधबाट समाजमा बढ्दो मनोसामाजिक समस्या, डिटिटल जोखिम, कानुनी अधिकार तथा सुरक्षा निकायले प्रदान गर्ने सेवा, सुविधाबारे सहभागीलाई जानकारी गराएका हुन् ।

पोखरा बहुमुखी क्याम्पसकी प्रमुख शिशुकला पराजुलीले लैंगिक हिंसा नै समाज विकासको सबैभन्दा ठूलो सामाजिक समस्या भएको विचार राख्दै यसलाई निर्मूल पार्न विद्यार्थी जीवनमै सिक्नुपर्ने बताइन् । पोखरा बहुमुखी क्याम्पस सञ्चालक समिति अध्यक्ष नरेन्द्रमान लालचनको अध्यक्षतामा भएको कार्यक्रममा बिद्यार्थी, प्राध्यापक र कर्मचारी गरी ७५ जनाको सहभागिता थियो ।