पोखरा– पोखराको हेमजामा भएको साहित्य महोत्सवको रौनकबीच गायक तथा संगीतकार प्रेमराज पौडेलको नयाँ म्युजिक भिडियो ‘एक्लो रात’ सार्वजनिक गरिएको छ । शनिबार आयोजित एक समारोहमा वरिष्ठ भाषाविद् एवं कविवर मुकुन्दशरण उपाध्यायले भिडियोको विमोचन गरेका हुन् ।

भाषाविद् उपाध्यायको रथारोहण तथा नागरिक अभिनन्दन समारोहको अवसर पारेर यो सिर्जना बजारमा ल्याइएको हो । विमोचनपछि सर्जक पौडेलले कार्यक्रममा गीत गाएर सुनाएका थिए ।

सार्वजनिक ‘एक्लो रात’ गीतमा शब्द, संगीत र स्वर स्वयं प्रेमराज पौडेलको रहेको छ । प्रेम, विछोड र एकान्तपनको भाव समेटिएको यो गीत आधुनिक शैलीमा तयार पारिएको छ । भिडियोमा चर्चित कलाकार होमराज पौडेल र स्वस्तिका श्रेष्ठले अभिनय गरेका छन् । रामप्रसाद बास्तोलाको निर्देशनमा तयार भएको भिडियोको निर्माण शकुन्तला पहारीले गरेकी हुन् ।

पोखराको सांगीतिक क्षेत्रमा ‘नवोदित’ प्रतिभाका रूपमा उदाएका पौडेलले यसअघि पनि स्थानीय मञ्चहरूमा आफ्नो प्रस्तुति दिँदै आएका छन् । विशेष गरी शब्द रचना र संगीत कर्ममा रुचि राख्ने पौडेलले सुगम संगीतको क्षेत्रमा आफ्नो छुट्टै पहिचान बनाउने प्रयास गरिरहेका छन् ।

यसअघि विभिन्न सांगीतिक कार्यक्रम र अनौपचारिक सांगीतिक जमघटहरूमा आफ्ना रचना सुनाउँदै आएका पौडेलले ‘एक्लो रात’ मार्फत व्यावसायिक संगीतमा औपचारिक पाइला चालेका हुन् । उनी गायनमा मात्र नभई गीत लेखन र संगीत संयोजनमा समेत पोख्त मानिन्छन् ।

कार्यक्रमको सञ्चालन कविद्वय शिव त्रिपाठी र छन्दिका त्रिपाठीले संयुक्त रूपमा गरेका थिए । महोत्सवमा साहित्यका अन्य विधासँगै संगीतलाई पनि स्थान दिइएकोमा सहभागीले खुसी व्यक्त गरे ।