पोखरा– पोखराको नागढुंगास्थित चरक मेमोरियल हस्पिटल प्रालिले आफ्नो १३ औं वार्षिकोत्सव विविध कार्यक्रम गरी मनाएको छ । आइतबार आयोजित विशेष समारोहसँगै हस्पिटल स्थापनाको १४ औं वर्षमा प्रवेश गरेको हो ।

वार्षिकोत्सवका अवसरमा अस्पतालले सामाजिक उत्तरदायित्वअन्तर्गत शनिबार रक्तदान कार्यक्रम गरेको थियो भने आइतबार वैदिक बटुकहरूलाई ३० हजार रुपैयाँ आर्थिक सहयोग हस्तान्तरण गर्यो । सोही अवसरमा अस्पतालमा कार्यरत उत्कृष्ट चिकित्सक तथा कर्मचारीलाई ‘अवार्ड’ प्रदान गरी सम्मान गरिएको थियो ।

कार्यक्रमका प्रमुख अतिथि गण्डकी प्रदेश स्वास्थ्य मन्त्रालयका सचिव डा. विश्वबन्धु बगालेले निजी क्षेत्रका अस्पतालले पनि सामाजिक उत्तरदायित्व बहन गरेकोमा खुसी व्यक्त गरे । सामाजिक सुरक्षा कोषका योगदानकर्तालाई गण्डकी प्रदेशमै सबैभन्दा बढी स्वास्थ्य सेवा प्रदान गरेबापत नेपाल सरकारबाट सम्मानित भएकोमा उनले अस्पताल प्रशासनलाई बधाई दिए ।

हस्पिटलका अध्यक्ष रामचन्द्र रेग्मीको अध्यक्षतामा भएको कार्यक्रममा प्रबन्ध निर्देशक कपिल पोखरेलले सेवाग्राही र शुभचिन्तकप्रति आभार प्रकट गरे । ‘पोखरा तथा आसपासका जनतालाई स्तरीय सेवा दिने उद्देश्यले स्थापित हस्पिटलले विश्वास जित्न सफल भएको छ,’ पोखरेलले भने, ‘आगामी दिनमा सेवालाई अझ परिष्कृत र विश्वासिलो बनाउने प्रतिबद्धता जनाउँछौँ ।’

अत्याधुनिक सुविधासहितको सेवा

विसं २०६९ मंसिर १० गते स्थापना भएको चरक हस्पिटल हाल १०० शय्या क्षमतामा सञ्चालन भइरहेको छ । नागढुंगामा रहेको हस्पिटलको ७ तले भवन भूकम्प प्रतिरोधी हुनुका साथै छतमा हेलिप्याडको सुविधासमेत रहेको छ ।

प्रबन्ध निर्देशक पोखरेलका अनुसार हस्पिटलले अत्याधुनिक उपकरण र नवीनतम प्रविधिमार्फत सेवा दिँदै आएको छ । यो ‘मल्टी–स्पेशालिटी’ हस्पिटल विशेष गरी मुटुरोग उपचार र शल्यक्रियाका लागि परिचित छ ।