पोखरा । मुग्लिन–पोखरा सडक आयोजना (पश्चिम खण्ड) ले पोखरा महानगरपालिकाभित्रका सडक छेउका घरधनीले जथाभावी नाली फुटाएर फोहोर पानी मिसाएको भन्दै आपत्ति जनाएको छ । एसियाली विकास बैंक (एडिबी) को ऋण सहयोगमा निर्माणाधीन जामुने–पोखरा खण्डअन्तर्गत सेती–कोत्रे क्षेत्रमा स्थानीयले नवनिर्मित संरचना बिगारेपछि आयोजनाले सम्बन्धित वडा कार्यालयहरूलाई पत्र पठाउँदै यस्तो कार्य रोक्न आग्रह गरेको हो ।

आयोजना प्रमुख कृष्णबहादुर कुँवरले आइतबार (मंसिर २१ गते) पोखराका वडा नम्बर १०, १४, २६, २७, २९, ३० र ३२ का वडा कार्यालयलाई पत्र लेख्दै सार्वजनिक सम्पत्तिको नोक्सानी रोक्न पहलकदमीका लागि अनुरोध गरेका छन् । निर्माण व्यवसायीले बजार क्षेत्रमा ‘सर्भिस लेन’ बनाउँदै गर्दा स्थानीयले घरको ‘वेस्ट वाटर’ (फोहोर पानी) व्यवस्थापन गर्न भन्दै नाली फुटाउने र ‘सर्भिस लेन’ मा गाड्नका लागि खाडल खन्ने गरेको पाइएको छ ।

स्थानीयले ‘एचडिपिइ’ पाइपमार्फत घरको फोहोर पानी सडकको नालीमा जोड्ने गरेका छन् । यसका लागि उनीहरूले ‘सर्भिस लेन’ मा पाइप गाड्ने, नाली फुटाउने र निर्माण भइसकेको ‘सब–बेस’ समेत खन्ने गरेको आयोजनाले जनाएको छ । यस्तो क्रियाकलापले ‘सर्भिस लेन’ को दिगोपनामा असर पर्नुका साथै सार्वजनिक सम्पत्तिको क्षति भएको कुँवरले उल्लेख गरेका छन् ।

आयोजनाका अनुसार सडक छेउको नाली वर्षायामको पानी व्यवस्थापन गर्न मात्र डिजाइन गरिएको हो, घरबाट निस्कने फोहोर पानीका लागि होइन । हाल निर्माण गरिएको नालीमा ‘कभर’ को व्यवस्था नभएको (सुरक्षाका लागि डब्लु–बिम क्र्यास ब्यारियर मात्र राखिएको) हुनाले फोहोर पानी नालीमा मिसाउँदा जम्ने, दुर्गन्ध फैलिने र अन्य रोगहरू लाग्ने जोखिम हुन्छ ।

महानगरपालिकाको अग्रसरतामा घरधनीले नै आफ्नो पानीको व्यवस्थापन गर्ने गरी पटकपटक छलफल भएको र यसअघि कात्तिक २ गते पनि पत्रमार्फत अनुरोध गरिएको भए पनि स्थानीयले अटेर गरेको आयोजनाको गुनासो छ । आयोजनाको अनुमतिबिना सडक खन्ने र सार्वजनिक सम्पत्तिमा नोक्सानी पुर्‍याउने कार्य सार्वजनिक सडक ऐन २०३१ विपरीत रहेको भन्दै आयोजनाले सचेत गराएको छ ।

साथै, आयोजनाले परामर्शदाता कम्पनीलाई सडकको नाली फुटाएर घरको फोहोर पानी मिसाउने घरधनीहरूको विवरण तयार पार्न निर्देशनसमेत दिएको छ ।

---