पोखरा ।  नेकपा (एमाले) को सचिवालय बैठकले विधान महाधिवेशनबाट पारित विधानअनुसार नै नेतृत्व चयन गर्ने निर्णय गरेको छ । शुक्रबार बसेको बैठकले पदाधिकारी संख्या हेरफेर नगर्ने र विधानको सर्वोच्चता कायम राख्ने निष्कर्ष निकालेको हो ।

उपमहासचिव प्रदीपकुमार ज्ञवालीका अनुसार अब पार्टीमा १५ जना पदाधिकारी र २ सय ५१ सदस्यीय केन्द्रीय कमिटी रहनेछ । महाधिवेशन सञ्चालनका लागि हालका सबै पदाधिकारी सदस्य रहेको अध्यक्ष मण्डल गठन गरिएको छ । यस्तै, प्रस्ताव र माइन्युट लेखनका लागि उपमहासचिवद्वय प्रदीप ज्ञवाली र पृथ्वीसुब्बा गुरुङलाई जिम्मेवारी तोकिएको छ ।

बैठकले महाधिवेशनका लागि ५ प्रतिशत मनोनीत कोटाअन्तर्गत १ सय ८ जना प्रतिनिधि छनोट गरेको छ । ११औं महाधिवेशनको उद्घाटन शनिबार मध्यान्ह १२:३० बजे भक्तपुरको सल्लाघारीमा हुने तय भएको छ ।

बैठकले गत मंसिर २४ गते सरकारले ‘जेनजी’ आन्दोलनका प्रतिनिधिसँग गरेको भनिएको सम्झौताप्रति गम्भीर ध्यानाकर्षण भएको जनाएको छ । सरकारले निर्धारित कार्यक्षेत्रभन्दा बाहिर गएर संविधान संशोधन गर्ने सम्झौता गरेको भन्दै एमालेले आपत्ति जनाएको ज्ञवालीले बताए ।