पोखरा ।
नेकपा एमालेका अध्यक्ष केपी शर्मा ओलीले आफ्नो पार्टीले देशलाई गलत दिशामा जान नदिने बताएका छन् । उनले बिहीबार भक्तपुरको सल्लाघारीमा पार्टीको ११ औँ राष्ट्रिय महाधिवेशनको उद्घाटन गरे । सो अवसरमा बोल्दै ओलीले एमाले मुलुकको मियो भएको दाबी गरे । देशलाई दुर्घटनामा जानबाट रोक्ने जिम्मा एमालेको भएको उनको भनाइ छ । उनले जस्तोसुकै चुनौती र प्रहार आए पनि त्यसलाई चिरेर अघि बढ्ने प्रतिबद्धता जनाए । अहिले पार्टीको पक्षमा जनलहर आएको उनको दाबी छ ।

अध्यक्ष ओलीले एमाले सस्तो राजनीतिक ‘स्टन्ट’ गर्ने पार्टी नभएको प्रस्ट पारे । यो पार्टी समृद्ध मुलुक बनाउने संकल्पमा अग्रसर रहेको उनले बताए । सुशासन र विकास चाहने सम्पूर्ण शक्तिले एमालेलाई साथ दिएको उनको भनाइ छ । उनले लोकतन्त्र र एमाले एकअर्काका पूरक भएको टिप्पणी गरे । उनले भने, ‘लोकतन्त्र अजेय छ । नेकपा एमाले अजम्मरी छ ।’ लोकतन्त्र र जनताको हितमा समर्पित शक्तिलाई निर्णायक बनाउनुपर्नेमा उनले जोड दिए । सिंगो देशलाई समृद्ध र सुखी बनाउने गन्तव्यतर्फ पार्टी अघि बढेको उनले सुनाए । कम्युनिस्ट पार्टी बलियो हुँदा मात्र राष्ट्रियता बलियो हुने उनको तर्क छ । ओलीले एमालेलाई सामाजिक न्यायको सुरुवाती अभियन्ताका रूपमा चित्रण गरे । नागरिकको जीवनको आधार यही शक्ति भएको उनले दाबी गरे ।

एमाले नै समावेशिताको वास्तविक अगुवा भएको ओलीले बताए । राष्ट्रिय राजनीतिमा सबै क्षेत्रको समावेशितालाई एमालेले स्थापित गरेको उनको दाबी छ । उनले एमाले नेपाली विशेषतासहितको समाजवाद निर्माणमा लागेको बताए । गाउँमुखी र जनसहभागितामूलक विकासको नेतृत्व एमालेले गरेको उनले स्मरण गराए । ठूला विकास आयोजनाको अभियन्ता पनि एमाले नै भएको उनको भनाइ छ । महाधिवेशनमा देखिएको विशाल उपस्थितिलाई बेवास्ता नगर्न उनले चेतावनी दिए ।

सम्बोधनका क्रममा अध्यक्ष ओलीले विघटित संसद् पुनःस्थापना हुनेमा आफूहरू विश्वस्त रहेको बताए । उनले वर्तमान सरकारको आलोचना पनि गरे । उनले गत भदौ २३ र २४ गतेको ‘जेनजी’ आन्दोलनको प्रसंग कोट्याए । त्यसमा घुसपैठ गराएर सरकारले राज्यका संरचना कमजोर बनाएको उनको आरोप छ । यद्यपि शान्तिपूर्ण र न्यायपूर्ण बलको जगमा लोकतन्त्र फर्किने उनले विश्वास व्यक्त गरे । अहिलेको सरकार निर्वाचनको वातावरण बनाउन लागेको छैन । बरु सरकार पूर्वाग्रह र संविधानविपरीतका काममा लागेको आरोप उनले लगाए । महाधिवेशनमा ओलीसहित अन्य दलका नेताले पनि बोलेका थिए ।

---