पोखरा । पोखराको गैह्रापाटनस्थित पश्चिमाञ्चल माविले ३४ औं वार्षिकोत्सवको अवसरमा आइतबार विद्यालयमा खुला रक्तदान आयोजना गरेको छ । संस्थागत सामाजिक उत्तरदायित्व निभाउने क्रममा आयोजित रक्तदानमा ५६ युनिट रगत संकलन भएको छ ।

नेपाल रेडक्रस सोसाइटी कास्की अध्यक्ष उर्मिला खड्काले पश्चिमाञ्चल फाउन्डेसनका पूर्व अध्यक्ष प्राडा विश्वकल्याण पराजुलीलाई ब्लड ब्याग हस्तान्तरण गरेर रक्तदान कार्यक्रमको शुभारम्भ गरेकी थिइन । विद्यालयका प्राचार्य सरोज कोइरालाले विद्यालयको वार्षिकोत्सवको अवसरमा आयोजित रक्तदानको यो १४ औं संस्करण भएको बताए ।

‘सामाजिक उत्तरदायित्व निभाउनका लागि रक्तदान कार्यक्रम आयोजना गरिएको हो । रगत अभाव हुन नदिन संस्थागत रुपमा यस्ता गतिविधि आवश्यक पर्छ,’ उनले भने । उनका अनुसार विद्यालयका ११ र १२ कक्षाका विद्यार्थी, शिक्षक, अभिभावक, कर्मचारी, संचालक समितिका सदस्य लगायतले रक्तदान गरेका थिए ।

पश्चिमाञ्चल फाउन्डेसनका अध्यक्ष प्राडा रामनाथ ओझाले स्वस्थ मानिसले गरेको रगतले कसैको ज्यान जोगाउन सघाउ पुग्ने बताए । उनले आगामी दिनमा पनि यस्तै संस्थागत उत्तरदायित्वका कार्यक्रम गर्दै जाने बताए ।

विद्यालयकी सहप्राचार्य मिनु श्रेष्ठ कुँवरले रगत दान नै जीवनदान भएकाले यस्ता गतिविधि आवश्यक रहेको बताए । कसैको जीवनदानका लागि अरु कसैको रगत आवश्यक पर्ने भएकोले पनि संस्थागत रुपमा उत्तरदायित्व निभाएको बताइन् ।

नेपाल रेडक्रस सोसाइटकी कास्कीकी अध्यक्ष खड्काले रगत अभाव हुन नदिन सहकार्य आवश्यक रहेको बताइन् । विद्यालयको वार्षिकोत्सव अवसरमा विद्यार्थीले विज्ञान प्रदर्शनी पनि आयोजना गरेका थिए ।