पोखरा ।

पृथ्वीराजमार्गअन्तर्गत तनहुँको म्याग्दे गाउँपालिका–६ मौरीबासमा आइतबार दिउँसो सवारी दुर्घटना भएको छ । यात्रुवाहक बस र स्कुटर एकआपसमा ठोक्किँदा स्कुटर चालकको ज्यान गएको हो । मृत्यु हुनेमा स्याङ्जाको पुतलीबजार नगरपालिका–७ भारकोट बस्ने ५१ वर्षीय लेशबहादुर थापा छन् ।

दमौलीबाट खैरेनीटारतर्फ जाँदै गरेको ग १ ख ९४०६ नम्बरको बस र विपरीत दिशाबाट आउँदै गरेको गण्डकी प्रदेश ०१–०१८६ नम्बरको स्कुटर दिउँसो करिब १ बजेर १० मिनेटमा ठोक्किएका थिए । दुर्घटनामा गम्भीर घाइते भएका थापालाई तत्काल उपचारका लागि शुक्लागण्डकी नगरपालिका–५ बेलचौतारास्थित जिपी कोइराला राष्ट्रिय श्वासप्रश्वास उपचार केन्द्रमा लगिएको थियो ।

उपचारकै क्रममा दिउँसो १ बजेर ४५ मिनेटमा चिकित्सकले उनलाई मृत घोषणा गरेको जिल्ला प्रहरी कार्यालय तनहुँका सूचना अधिकारी एवं प्रहरी नायब उपरीक्षक श्रवणकुमार विकले जानकारी दिए । प्रहरीले दुर्घटनामा संलग्न बसका चालकलाई नियन्त्रणमा लिएको छ । पक्राउ पर्नेमा स्याङ्जाको आँधीखोला गाउँपालिका–५ घर भई हाल पोखरा–१७ बिरौटा बस्ने ५१ वर्षीय चुडामणि शर्मा पोख्रेल छन् ।

दुर्घटनामा परेका दुवै सवारीसाधनलाई अहिले इलाका प्रहरी कार्यालय बेलचौताराको नियन्त्रणमा राखिएको छ । घटनाबारे थप अनुसन्धान भइरहेको प्रहरीले जनाएको छ ।