पोखरा । गृहमन्त्री ओमप्रकाश अर्यालले आगामी फागुन २१ गतेका लागि तय भएको प्रतिनिधिसभा सदस्य निर्वाचन निर्धारित मितिमै हुने बताएका छन् ।

पोखरामा सोमबार आयोजित गण्डकी प्रदेशस्तरीय सुरक्षा गोष्ठीलाई सम्बोधन गर्दै उनले निर्वाचन गराउन सरकार दृढ रहेको स्पष्ट पारे । निर्वाचन हुँदैन भन्ने भ्रममा नपर्न उनले आग्रह गरे । स्वतन्त्र र भयरहित वातावरणमा निर्वाचन सम्पन्न गर्न ‘प्रतिनिधिसभा सदस्य निर्वाचन एकीकृत सुरक्षा योजना, २०८२’ स्वीकृत भई कार्यान्वयनमा आएको उनले जानकारी दिए ।

गृहमन्त्री अर्यालले आन्दोलनका क्रममा फरार भएकामध्ये करिब ७० प्रतिशत कैदीबन्दी फिर्ता भइसकेको बताए । बाँकीलाई फिर्ता ल्याउने काम गृह प्रशासनले गरिरहेको उनको भनाइ छ । राजनीतिक दलहरूले लुटिएका हतियार र फरार कैदीबन्दीलाई प्रमुख सुरक्षा चुनौतीका रूपमा औंल्याएको विषयमा सरकार गम्भीर रहेको उनले बताए ।

अर्यालले दलहरूसँगको वार्ता, संवाद र छलफलका लागि सरकार खुला रहेको स्पष्ट पारे । उनले भने, ‘लुटिएका हतियार र सुरक्षा चुनौतीबारे सरकार संवेदनशील र जिम्मेवार छ ।’

‘जेन–जी’ युवाहरूको जनआन्दोलनको जगमा वर्तमान सरकार बनेको स्मरण गर्दै उनले आन्दोलनका क्रममा सहादत प्राप्त गर्ने ४२ जना ‘जेन–जी’ सुशासन योद्धा र ३ जना प्रहरीप्रति श्रद्धाञ्जली व्यक्त गरे । उनले प्रधानमन्त्री र ‘जेन–जी’ प्रतिनिधिबीच भएको सम्झौता राजपत्रमा प्रकाशित भई कार्यान्वयनको चरणमा रहेको जानकारी दिए ।

आन्दोलनका क्रममा ध्वस्त भएका संरचना र प्रहरी बिटहरूको पुनर्स्थापना गरी सेवा सुचारु गरिएको अर्यालले बताए । उनले सुरक्षा अधिकारीहरूलाई व्यावसायिक र निष्पक्ष भएर काम गर्न निर्देशन दिए । कार्यसम्पादनको मूल्यांकनका लागि निगरानी बढाइने र गल्ती गर्नेलाई नछोडिने उनको चेतावनी छ ।

गोष्ठीमा गण्डकी प्रदेशको सुरक्षा चुनौती विश्लेषण गरी निर्वाचन सुरक्षा रणनीतिका विषयमा छलफल भएको थियो । प्रदेश सरकारले पनि केन्द्रीय योजनाअनुसार आफ्नो सुरक्षा रणनीति बनाएर लागू गर्ने विश्वास अर्यालले व्यक्त गरे ।