पोखरा । नेपाली कांग्रेसका नेता एवं गण्डकी प्रदेशसभा सदस्य भोजराज अर्याललाई पुत्रशोक परेको छ । स्याङ्जाका नेता अर्यालका जेठा छोरा माधव अर्याल ‘मुक्ति’ को सोमबार निधन भएको हो । ३८ वर्षीय माधवको पोखरामा उपचारका क्रममा मृत्यु भयो ।

माधव पछिल्लो समय जापानमा बस्दै आएका थिए । त्यहाँ जन्डिसबाट गम्भीर बिरामी भएपछि उनलाई स्वदेश फर्काइएको थियो । करिब ५ महिनाअघि नेपाल ल्याएर उनको उपचार भइरहेको थियो । पोखरासहित विभिन्न ठाउँमा उपचार गराइए पनि उनलाई बचाउन सकिएन ।

मृतक माधवका श्रीमती दीपा र ९ वर्षीय छोरा आदीन छन् । उनका बुबा भोजराजसहित आमा भगवती अर्याल, भाइ मिलन र बहिनीहरू मनीषा तथा ममता छन् । बुबा भोजराज नेपाली कांग्रेसमा लामो समयदेखि सक्रिय छन् । उनले तत्कालीन वालिङ गाविसको अध्यक्ष र वालिङ नगरपालिकाको प्रमुख भएर समेत काम गरिसकेका छन् ।

माधवको शव पोखराबाट स्याङ्जाको वालिङस्थित निवासमा लगिने भएको छ । त्यहाँ अन्तिम श्रद्धाञ्जली अर्पण गरेपछि रामदी घाटमा दाहसंस्कार गरिनेछ । निधनको खबर पाएलगत्तै पोखरामा रहेका कांग्रेस नेता तथा जनप्रतिनिधिहरू अस्पताल पुगेका थिए । उनीहरूले मृतकप्रति श्रद्धाञ्जली अर्पण गर्दै शोकाकुल सांसद अर्यालसहित परिवारजनमा समवेदना प्रकट गरेका छन् ।

---